Ka World Health Organisation (WHO) da booddien bha ko yei poor wa i yap ki bru na u khñiang Coronavirus.
Ynne ka sngi hapoh ki 24 kynta i yap ki bru man i iwa boon tam neibhah hapoh ki 24 kynta da yap 38 ngut ha China.
Ka WHO lyngba ka chnat International Health Regulations Emergency Committee daw chong pyrkhat noh ko myntu ka sngi wow rai lada toh u pynbna ya ka Global Emergency namo ka Public Health Emergency of International Concern (PHEIC) heiyatoh wa uni u khñiang neibhah i yap ki bru dang ku i kat dang lai ki sngi.
Ka PHEIC toh kawa pynbna da ka WHO manda joor i chah ktah ki bru khamtam i poor i kjut na kawi ka ri cha kawi ka tawon wei emkaam i yakrehlang yong ki ri ka pyrthai ha kiwa boon ki bynta, nadooh i khang ya i lai i wan wa kiwi kiwi.
Hadooh ynne ka sngi du hapoh China kiwa da tikna wa yoh ya uni u khñiang Coronavirus da kynjoh i cha ka 7,711 ngut katwa kiwa da suba wa em u khñiang da kynjoh i cha ka 81,000 ngut.
Kam chibynta wow khang yei poor uni u khñiang ka China da khang (Quarantine) ko ya ki 16 tylli ki sorbah (Cities) kiwa em da ki klur ngut ki bru.
Ki ri kiwa da poor uni u khñiang kynthup ki ya ka United States, Canada, France, Germany, Finland, UAE, Nepal, Cambodia, Sri Lanka, India, Thailand, Malaysia, Australia, South Korea, Japan, Philippines, Vietnam, Singapore wa kiwi kiwi.
Discussion about this post