Ka World Health Organisation (WHO) ynne i step synyaw ha Geneva, Switzerland da pynbna ko ya ka Global Health Emergency namo ka Public Health Emergency of International Concern (PHEIC) hadien wa poor u khñiang Coronavirus ya uwa da tip leh kam u 2019 nCoV da poor u ha kylleiñ ka pyrthai khlem ye u khang.
Hadooh wa man ynne ka sngi ka National Health Commission yong ka China da pyntikna wa kiwa yap neidaw u Coronavirus da poi i cha ka 213 ngut na ka 170 ngut ynnin.
Kiwa hadooh ynne ka sngi kiwa da chah ktah namo kiwa da bi kjut na uni u khñiang won da kynjoh i cha ka 9,000 tam na ka 7,736 ngut ynnin ka sngi.
Heiyatoh wa ini ka WHO ynne i step da pynbna noh ko ya ka Global Emergency namo ka Public Health Emergency of International Concern (PHEIC) heiyatoh wa uni u khñiang.
U Director General ka WHO, u Dr. Tedros Adhanom Ghebreyesus da pynbna u ya ka PHEIC hadien wa kut ka yalang wa jhan namo ka (Emergency Meeting) ha Geneva.
Kani man ko ka sien wa ynru wa ka WHO da pynbna ko ya ka PHEIC nadooh wa pynkrehkaam ya ka International Health Regulations (IHR) ha u 2005 hadien wa mih ka kjut Severe Acute Respiratory Syndrome (SARS).
Hanlada ka WHO da pynbna ko ya ka PHEIC tangwa ympu em e rai ko wow pynkhor (Strict Regulation) heiyatoh wa i lai i wan ki bru wa i khayi pateiñ hapyrdi ki ri.
Ya ka PHEIC da pynbna da ka WHO hadien wa i chait i khiah ki paidbah ye i wow chah ktah hadien wa poor i rukom kjut na kiwi ki ri wei emkaam wow yakrehlang ki ri wow khang yei poor i.
Hadooh katni ya ka PHEIC nadooh wa sdang ya ka ha u 2005 da pynkrehkaam ya ka dang du san sien donhi, itæ ha u 2009 heipor ka H1N1 namo Swine Flu, ha u 2014 neidaw ka Polio, ha u 2014 neidaw ka Ebola ha West Africa, ha u 2016 neidaw ka Zika wa ha u 2019 neidaw u Ebola ha Democratic Republic of the Congo.
Hadooh wa man katni da pyntikna wa uni u khñiang da ktah u ya palat 100 ngut ki bru ha ki 18 tylli ki ri wei i yap na uni u khñiang toh du ha China donhi.
Discussion about this post