U Riki Mukhim, Publicity Secretary ka HYC War Jaiñtia Circle haka kyrwoh khubor da ong u wa ki khynnah wa ki khynroo wa lai puræ hapoh ka jylla da diaw mynsien ki hajrong ka Scheme Scholarship wa slem ka sorkar wow pyllait katkam i bhah wa da mang kyrpang neibynta yong ki wa toh u yoh man u snem.
Ini i leh thurmur ka sorkar da ktah ko khamtam ya kitu ki khynnah kiwa wan na ki manyung wa dooh wa duk kiwa da yooluti wow yoh yarap na kani ka Scheme yow su yaka bai skur, bai College, thied kot wa kiwi wa emkaam.
U Mukhim da ong u wa ka sorkar pyrdi hadooh ka sorkar jylla toh u pyllai yumut ki wow booh ya kiwa dang lai puræ hakhmat neibhah man ki ka mynried ka mankawi ka ri waka jaitbru wei kiwa mihkhmat toh u kynmoo ki ya ini.
Da ong u leh wa da pyrchang u wow thooh bniah yei daw wa slem u poi ka Scholarship tangwa ym chem u ya ki daw tre, wei manda thooh yutip lyngba ka website “pfms.nic.in”, na katai ka website da pynyoo ko wa yaka Scholarship yong uwi u khynroo wa lai puræ kawa toh u poi haka 31-08-2019 tangwa ha i jooh i por da pynyoo, ym ye wow poi (Failed) wei da pynyoo leh “Failure Reason: R98”.
Ini waroh da wanrah ko wa ki khynnah wa ki khynroo wa lai puræ da ngiah ki wow yaleh Scholarship heiwa kiwa boon da ong ki wa lut wei sepai ka poisa wow lai phet cha wah cha neiñ, u yaleh Affidavit, u yieñ laiñ ha ki Cyber tangwa ka Scholarship won ym poi.
Ini ym toh de i jia wa nyngkong wei da jia man ka snem, kamtæ da kyntu yaka sorkar wow pyrkhat thymme kammon wow pynyoh yaka Scholarship heipor wa biang katkam ka bhah wa toh u yoh ki, pynkut ka kyrwoh.
Discussion about this post