Ka sorkar ka ri Japan da pyntikna ko wa 10 ngut ki bru na ki 3,711 ngut da yoh ki ya u khñiang Coronavirus hapoh ka jhaad Diamond Princess ya kawa da pynsangeh wei da khang kset (Quarantine) ha sorbah Yokohama, Japan.
I poor uni u khñiang ha kani ka jhaad toh hadien wa uwi u bru uwa 80 snem uwa wan na Hong Kong wei em u ya uni u khñiang, da chong u ha kani ka jhaad du kamwa san sngi donhi.
Uni u bru da chong u ha ka Diamond Princess na Yokohama ha ka 20 Duyatra (January) wei da hiar u na ka ha ka 25 tarik ha Hong Kong, wei da pyntikna wa em u ya u khñiang Coronavirus ha ka 1 Thohlakhmi (February), ynru sngi hadien wa hiar u na ka jhaad.
U montri ka chnat i chait i khiah ka Japan, u Katsunobu Kato da ong u wa da booddien ya kamwa 273 ngut kiwa yajan wa uni u bru wei ynne da pyntikna wa uni u khñiang da poor u cha ki 10 ngut hapoh kani ka jhaad wei katni dang em ki hapyrdi i chah sumaar.
Ka sorkar Japan da yaleh ko wow khang yei poor uni u khñiang na kani ka jhaad nadooh ka 3 tarik deiwa khang ya ki bru u mih ki na ka.
Kiwa em hapoh yong ka ymye ki wow mih na ka hadooh palat 14 sngi iwa man i por wow pyntikna wa ym em ki ya uni u khñiang.
Neiliang ki bru ka chnat i chait i khiah dang booddien ko yei man i long yong waroh kiwa em hapoh kani kani ka jhaad.
Kattu kiwa yoh ya uni u khñiang ha Japan da kynjoh i cha ka 30 ngut.
Discussion about this post