Shillong: U Abhay Negi haka yalehke First Class Cricket yong oo da leh bha dooh u ynne ka sngi wa ar ka yalehke ka Meghalaya pyrchah yaka Sikkim haka Ranji Trophy wa pynman ha Mangaldai, Assam.
U Negi da yoh u 4/32 hadooh wa kut ka yalehke ynnin ka sngi wei ynne da yoh u sa 3 Wicket deiwa e 10 Run yow pynkut da 7/42. Ka Sikkim hawa pteiñ na 105/6, da haap lut ki Wicket ko deiwa kamai 128 Run, iwa bood 46 Run ya iwa kamai nyngkong ka Meghalaya wa 174 Run. U Dipu Sangma leh da yoh u sa chi Wicket ynne yow yoh 3/16 iwa man leh iwa lehbha dooh u ha ka yalehke wa soo sngi.
U Negi won da yoh u sa le Wicket haka Innings wa ar ka Sikkim kiwa kut ka kamai Run ki da 66/7 ynne chooh ka sngi. Kamtæ u Negi da kamai u 10/59 deiwa emlaad wow yoh chooh ki Wicket mynstep.
Ka Meghalaya hawa Bat ko haka Innings wa ar da lehbha u Wallam Lyngdoh Kynshi uwa kamai 29 Run wa u Tengchan Sangma 31 Run. U Guest-professional Ravi Teja da yarap u da 29 Run wei kini ki Run waroh toh kiwa emkaam bha hadien wa pynhaap ka Sikkim ya ki Guest-professional u Punit Bisht uwa yoh Duck wa u Sanjay Yadav uwa yoh chi Run. Kini ki arngut toh kiwa kamai mar 85 wa 40 Run haka Innings wa nyngkong ka Meghalaya.
U Teja wa u Tengchan Sangma da kamai lang ki 55 Run yaka Wicket wa le, tangwa ka Meghalaya da haap kiwa Bat cha pyrdi deiwa dooh ko 4 Wicket da 7 Run wei da wan u Dipu Sangma (26) wa u Wanlambok Nongkhlaw (12) kiwa da booh lang 43 Run yaka Wicket wa ynñiaw.
Ka Meghalaya da haap lut ki Wicket ko da 155 Run iwa booh thong yaka Sikkim 202 Run yow jop.
Ka Sikkim da haap smat kiwa Bat nakhmat yong ka ha u Negi (3/17), Yadav (3/34) wa u Chengkam Sangma (1/2) heiwa ki 5 Wicket da haap ki deiwa yoh du 16 Run.
Manda poi ka Sikkim 66/7 da pynkut yaka yalehke ynne ka sngi wei dang emkaam ko sa 136 Run yow jop.
Discussion about this post