Kiwa hayung hasem yong ki arngut ki khynnah wa dang yatoh chipayu arbei ynne ka sngi da pynche ki hajrong i poor ka khubor lyngba ki Social Media kam ha Facebook wa WhatsApp heiwa deilang ki dur yong pyn-ar ki khynnah da thoh leh yei kyntien wa ki man ki ki chohnoh wei da dep pynyap bru haroh ki.
Neiliang kiwa hayung hasem kitai ki khynnah manda sñiaw ki wa poor ka khubor chawah chañeiñ wei da em i kdaw kti wa man chohnoh ki khon ki, kamtæ da khyrngiat da phylla ki wei da tieñsar haroh ki ya jia iwon iwon yaki khon kamjooh yaka yung ka sem, neitæ manda kylli takit ki naki khon chem ki wa hanpaya wa yaleh kyndeh hi ki pyn-ar deiwa booh (Upload) kylliang ki yei dur ha Facebook, u chynrang wa dang 14 snem i rta da Upload u yei dur ka payu arbei u deiwa thoh leh yei kyntien “Kat kiwa chem ia kani ka bru sngawbha inbox ianga wa toh ka chohnoh da ah khlieh bru ko nin”, katwa ka kynthai won wa dang 15 snem da Upload ko yei dur yong oo deiwa thoh yei kyntien “Pait Paralok ni bru ah khlieh u r ngut ha Lumshnong enin miet (Shoh noh)”.
Ynne i janmiet heipor hawa wan pynche ki hakhmat ki pulit ka Jowai Police Station, kini ki khynnah da phla ki wa yei dur da Upload kylliang ki chirup hi haka miet 2 tarik uni u bnai deiwa mut u leh kyndeh donhi hapyrdi i yakmen yarkhai, tangwa hadien wa poor ka khubor iwa da joor nadooh ka 4 tarik, wot ki leh da ya tieñ sar ki wei da sñiawthooh ki yei leh bakla ki.
Heiyatoh wa ini, neiliang kiwa hayung hasem wa naka chnong Barato West Jaiñtia Hills District kiwa da em hei sahir mynsien khamtam ka bei yong kini ki khynnah da kyntu ki yaki paidbah wa ini wym toh iwa sakhiat tangwa i bakla donhi, heijooh i por kyrpaad joor ki leh yaki paidbah wow dam u pynpoor (Share) ki kylleiñ kylleiñ.
Discussion about this post