Shillong: Ki seiñbhalang kiwa em hapoh ka Confederation of Meghalaya Social Organisation (CoMSO) ynne ka sngi da saam ki yaka kot lakdop kam chibynta wow pynjoor ya i dawa wow pynkrehkaam da ka Inner Line Permit (ILP) ha ka jylla.
Ya kini ki kot lakdop da saam ha thaaiñ Motphran, Khyndailad wa cha kiwi ki thaw ha kylleiñ ka sor Shillong.
Ka CoMSO dang pteiñ ko leh wow pynman ya ka yakhih deiwa chong kyllaiñ myngor ha pchem ka State Central Library, Shillong.
Ha ka kot lakdop, da batai wa i thmu yong kani ka aiñ toh wow yada ya ki jaitbru tre ri khian paaid na i chahtyllep noh ha ki poiwir baar ri wa baar jylla deiwa kdoh u khoom wei pynkhor yei psiah laitlan ki poiwir ha ka jylla wa chong ki tre ri tre muluk.
Kat hadooh katni, ya ka ILP da pynkrehkaam ha ki soo tylli ki jylla ka thaaiñ mihsngi, ha jylla Arunachal Pradesh, Mizoram, Nagaland wa Manipur. Neitæ ki aiñ wa sariem ya ka ILP krehkaam ki ha Sikkim, Andaman and Nicobar Island wa ha Ladakh.
Discussion about this post