Jowai : Heiyatoh wa mih ka hukum na ki bor District ka Moulvibazar, Bangladesh wow beh chnong ya ki paidbah ki ar chnong kiwa kynthup ya ka Nahar Aslom wa ka Nahar Kailin ynne ka sngi dang mih i kyrchaan ya ki na ki seiñ waphær waphær.
Ha kani ka kynti ki paidbah ki ar chnong da yoh kyrchaan ki na ki seiñ kam ka Bangladesh Indigeneous Students’ Council, ka Khasi Students Union, Bangladesh wa kiwi kiwi kiwi.
Ynne ki dkhot ka Bangladesh Indigeneous Students’ Council da yakhih ki deiwa yieñ ki kam ka dak wow pyrchah yei leh ka sorkar ha Shahbagh, Dhaka kawa man kawi na ki thaw wa kyrpang ha ka nangbah Dhaka.
Ha ini i yakhih, jar jiar ki paidbah da rah ki yaki Banner wada thoh yaki kyntien wa pyrchah yaka hukum wow beh chnong ya kini ki Pnar na kini ki ar chnong heiwa da kbai yaki kyntien pyrchah yeini lyngba ki tanghæng.
Heijooh i por ka KSU Sylhet da lai cha kini ki chnong yow sylli yeini waroh heiwa ka leh da pyrchah ko ya kani ka hukum wa mih na ka office u DC.
Neiliang ki bru samen leh kiwa na Dhaka da lai ki wut wut cha Moulvibazar heiwa da yachem wa ki heh ki bor District.
Heiyaklam u Wyrta wa u M.M. Jahan Mithun uwi na kiwa kreh monsnaiwbha ya i hok ki paidbah ha Bangladesh da ong u wa ini waroh i leh embor ki bor ka sorkar man i iwa beaiñ wei iwa khlem pyrkhat.
Da kylli u leh wa kammon ye ki u pynmih ya kam kani ka hukum hajrong wa dang em ka mukotduma wa dang sah ha ki yung bichaar hei yatoh weini.
Da kyntu u leh ya ki bor sorkar wa ki bor district wow chimkhia ki yeini waroh neibynta i hok yong ki bru wa im wa sah hapoh ka ri Bangladesh waroh kawi.
Discussion about this post