Palat 2,600 ngut ki bru da yoh thymme ki ya u khniang COVID-19 ha China, da pyntip ki heh ka chnat i chait i khiah ynne ka sngi.
Waroh kiwa da yoh ya u Coronavirus uwa da tip katni kam u COVID-19 hapoh China kattu da poi i cha 66,492 hadien wa 2,641 wa da yoh thymme hadooh ynnin ka sngi da pyntip ka National Health Commission ka China.
Kiwa yap da ku da 143 iwa waroh da poi cha 1,523 ngut heiwa kiwa boon kiwa yap toh kiwa em hapoh Hubei Province.
U heh ka National Health Commission u Liang Wannian da pyntip u wa ka sorkar da yaleh ko wow pynneh ya uni u khniang du hapoh Wuhan, ka chnong kawa da chah khang kset kattu la le tayaw.
Kiwa yap ha Hubei da ku ko cha 139 ngut hadooh ynnin, heiwa 107 ngut toh kiwa em hapoh Wuhan. Waroh 1,123 ngut kiwa da yap toh du hapoh Wuhan na u COVID-19.
Cha baar ka China, da em kamwa 450 ngut ki bru wa yoh ya uni u khniang ha ki 24 tylli ki ri wei da yap le ngut.
Ka Egypt ynnin da pyntikna ya uwa yoh nyngkong dooh ya u COVID-19 uwa na baar ri.
Ki le ngut kiwa da yap cha baar ka China toh uwi ha Japan, uwi ha Hong Kong wa uwi ha Philippines.
Uni u khniang da pynyap u ya kamwa 2% kiwa yoh ya oo tangwa da poor smat u bar ya kiwi ki khniang (Respiratory Viruse) wa mih napoh kani ka ri.
Na ki wakreh haka chnat i chait i khiah hapoh China, la 1,716 ngut da yoh ki ya uni u khniang wei la 6 ngut da yap ki.
Discussion about this post