Shillong: Ka Meghalaya da jop ko da 5 Wicket yaka Arunachal Pradesh haka yalehke ka U-23 Col CK Nayudu Trophy wa pynman ha Mangaldai, Assam, ynne i step.
Ka Meghalaya da emkaam ko sa 22 Run yow jop hadooh wa kut ka yalehke ynnin ka sngi heiwa da yoh ki yei jop ynne i step hapoh 10 Over da kiwa Bat kitæ u Roshan Warbah (27 not out) wa u Adarsh Joshi (18 not out) kiwa pteiñ na iwa ieh ki ynnin ka sngi.
Ka yalehke wa sdang haka 14 tarik heiwa da Bat nyngkong ka Arunachal kawa kamai 153 All Out heiwa u Elchiang Ch Momin da yoh u 4/34, u Anish Charak 3/22 wa u Roberth Sangma 2/30, man ki kiwa yoh Wicket yaka Meghalaya.
Ka Arunachal da pyntam ko da 35 Run haka Innings wa nyngkong hadien wa haap lut ka Meghalaya deiwa kamai 118 Run, tangwa ka Meghalaya da jubab ko deiwa pynhaap won yaka Arunachal da 94 Run ynnin ka sngi, heiwa u Charak da yoh u 5/24 (waroh 8/46), u Joshi (3/7) wa u Akash Kumar Choudhary (2/24) toh kiwa da lehbha na kiwa kawang bol ka Meghalaya.
Deiwa emkaam 130 Run yow jop, u Kishan Lyngdoh da yoh u da jan marchiteiñ ki Run wa emkaam deiwa kamai 73 Run naka 74 bol ynnin ka sngi. Kini ki Run da man ki kiwa emkaam bha hadien wa soo ngut kiwa Bat da haap smat ki hapoh chipaw Run samen. U Warbah wa u Joshi da ya krehlang ki yow yoh ya ki Run wa sah.
Discussion about this post