Sa kawi ka jhaad Cruise Ship kawa tip kam ka Westerdam kawa kit ya 1,455 ngut kiwa lai uiñke suwari wa 802 ngut ki wakreh ha ka, da chah kyntait ko wow sangeh ha kiwa boon ki ri heiwa nyngkong heipor wa mut ko wow lai sangeh ha Japan da chah kyntait ko, hadien ini da chah kyntait ko ha ki ri kam ka Taiwan, Thailand, Japan, Philippines wa Guam wei da neh ko ha duriaw 13 sngi nadooh wa mih ko haka chi tarik uni u bnai na Hong Kong.
Neidaw wa boon kiwa em hapoh kani ka jhaad da ku ki na Hong Kong iwa man i sor wa em kiwa yoh u COVID-19 kamtæ kiwi ki ri da artatien ki wow chah u hiar kiwa em hapoh kani ka jhaad.
Tangwa haka 13 tarik uni u bnai, ka ri Cambodia da chah ko ya kani ka jhaad wow sangeh ko ha i thaw sangeh jhaad wa em ha Sihanoukville wei da yaroh ya ini i leh ka Cambodia da ka WHO kawa ong wa ini pynyoo yei ya tylli para bru hapoh ka pyrthai. Ka ri Cambodia da chah ko leh ya kiwa em hapoh ka jhaad wow hiar ki yow liwan ki cha jar jiar ki ri yong ki.
Hadien ini, kawi ka bru wa hiar na kani ka jhaad da chem hadien wa leh Test wa em ko ya u COVID-19 ha Malaysia wei ini da pynpyrkhat ko wa kiwi kiwa da hiar na kani ka jhaad ye ki leh wow yoh ya u uni khñiang.
Kattæ da sdang wow thooh ya kitu kiwa da hiar na kani ka jhaad.
Kamwa 20 ngut kiwa em ha kani ka jhaad da pait yaki da ki Doctor hadien wa chitom wei da leh ya ki Test katwa ya kiwa boon hi da chim du katwon ku i chit i doh ki wei dep neitæ pyndap ki yaka Form wei da chah u hiar ki na kani ka jhaad.
Kawi na kini kiwa hiar na kani ka jhaad kawa 83 snem kawa na USA da hær won ko deilang wa 144 ngut cha Malaysia wei manda poi ko ha Kuala Lumpur da sdang ko wow chitom wei da chem wa em ko ya uni u khñiang.
Du hadien ini wa kiwa dang sah wa em haka jhaad da sdang wow leh yaki da Test wa toh rukom tangwa ini da leh du hadien wa ki spah ngut da yoh ki wow hiar na kani ka jhaad.
U Dr. Asok Karup naka Infectious Diseases Care Clinic ha Singapore da ong u wa waroh kiwa em hapoh ka jhaad toh wow sylli ya ki da ki Test wa yatoh wa ini i jait kjut wei i elaad ya kiwa em hapoh wow ong ki pyn da ki ya ki hi wa sñiawchait ki man i rukom wa bakla.
Da ong u leh wa i em 2 tayaw hapoh ka jhaad ym em mut wa man kamwa leh Quarantine neibhah kiwa em hapoh ka jhaad yoh ki wow uiñ wow lai katwa ngait ki wei ym em kset ya ki.
Kiwa pynlai yaka Westerdam kawa tip kam ka Holland America Line da ong ki wa ym em yoo ki yaki dak ki chin wa em u COVID-19 haka jhaad wei heipor wa em haka duriaw da leh ki wow chim hadooh katwon ku i chit kiwa em hapoh jhaad wa kiwi de ki Test.
Ha Sihanoukville ka sor wa yajan bha ka khayi pateiñ waka China, kiwa hiar naka jhaad da pdiang yaki da ki syntu wa ki that kup tynre ka Cambodia da u Prime Minister ka ri u Hun Sen.
Ha ini i pdiang ya kiwa hiar naka jhaad da ki heh ka ri ym em leh sap ki ya kiwon kiwon ki wow yada na u khñiang kam ki Face Masks.
Ka Holland America da kam ko leh wa kamwa man kattæ waroh kiwa dang em hapoh ka jhaad hadien wa leh yaki Test ym em pynyoo ki wa yoh ki ya u COVIDF-19 wei kani ka jhaad u neh chwa ko ha ini i thaw hadooh wa dep Test sa ya ki 747 ngut ki wakreh kani ka jhaad.
650 ngut kiwa man kam kiwa uiñke suwari toh kiwa na USA, 270 ngut na Canada, 130 ngut na UK, 100 ngut na Netherlands, 50 ngut na Germany wei da em leh kiwa na Australia.
Ki wakeh won hapoh ka jhaad kiwa boon toh ki nong Indonesian wa ki Filipinos.
Ka Holland America da ong ko leh wa daw e ko katwa em ko i yutip chaphang ki Passengers cha ki ri yong ki yow ye ki wow kynjoh ktien namo yow tip ki cheiwon em ki.
Ka Malaysia hadien ini waroh da pyntip ko wa ki Passengers wa hiar naka Westerdam kiwa lai luti lyngba ka Kuala Lumpur waroh da mih ki napoh ka ri tangwa ym chah de ko ya kiwi kiwa hiar na kani ka jhaad wow psiah chapoh ka ri namo wow hiar ha Airport yow lai ki cha kiwi ki ri.
Ka Thailand leh da khang ko ya kiwa em hapoh ka Westerdam wow psiah chapoh ka ri wei kiwa da yoh u psiah chwa da leh biang yaka Medical Screening yaki.
Kiwi ki ri kam ka Singapore da ong ki wa ym chah ki ya kiwon kiwon kiwa jooh chong ha kani ka jhaad wow psiah chapoh ka ri.
Discussion about this post