Ki wakreh ka JHADC hapoh ka lama Jaiñtia Hills Autonomous District Council Staff Association (JHADCSA) ynne ka sngi da tia ki cha ka kamra krehkaam u CEM ka Council u Thombor Shiwat heiwa da ekti ya ka dorkhat wow dawa pynlait noh yaka tulop yong ki kawa dang sah kattu la 5 bnai.
Ki wakreh ha ka dorkhat da ong ki wa da wan biang ki sa chisien neidaw wa ka tulop/Arrear yong ki da sah ko nadooh u Naikhynde (September) 2019 wei ini da ktah i hadooh ka puræ puthi ki khon yong ki wei kiwa ha yung ha sem yong ki khamtam kam heini i por wa joor i lut neibynta ki khon wa dang lai skur.
Ki wakreh da dawa ki wow pynlait noh ya ka tulop yong ki hapoh u Wisu (March) 2020 wei lym kamtæ daw sdang ki dei yakhih wow sangeh kreh wa jai jai namo ka (Pen Down Protest).
Da pynsñiaw ki leh yei sñiawsih wow tip wa yaka dorkhat wa e ki ha u snem wa dadep, neiliang ka Executive Committee da ong ki wa neidaw wa duna wei chitom poisa ymye wow su tulop ha uni u snem mang poisa (Financial Year).
Hawa yaklam wa kiwa yahkhmat ka JHADCSA da pyntip ki wa ha i yachem neiliang u CEM, u Thombor Shiwat da ong u wa ym du ki wakreh tangwa wot ki MDC leh dooh tulop ki wei ka EC leh sñiawthooh bha ko yei eh i khoo wa chem ki wakreh ka Council.
Neiliang u CEM da kyntu u leh ya ki wow man ki kiwa yaichah wei kyrmen u wa hapoh u Wisu u ye noh u pynlait ya ka tulop kamwa 2-3 bnai.
U CEM da ong u leh ha kiwa yahkhmat ka JHADCSA wa lada ymye u e ya ka tulop ya ki ha u Wisu, wot ki MDC leh u sdang yakhih ki chirup deiwa sangeh u kreh.
Heijooh i por u Thombor Shiwat da pyntip u ya ki, wa i bor ym chong i ha oo tangwa chong i ha ka sorkar jylla wei lada ymem de chaniah ki ya oo ye ki wow e dei thoh wei oo leh smat u wow hiar na ka chuki kam u CEM.
Discussion about this post