Ka Internet ha kani ka juk thymme man ko kawa emkaam hadooh kattæ kattæ. Lyngba ka Internet da ki hajar ngut ki paidbah hapoh ka jylla kiwa imja kpoh wei im nongsngi lyngba ka Internet, neibhah ini, lada dooh noh ya i bor ka Internet du chi kynta leh i dooh nong man ka kawa ktah hadooh kattæ kattæ ya u paidbah.
Hawa kyruiñ ha kini ki por wa da dep, i pyndooh yaka Internet hapoh Meghalaya da man ko hadooh le sien daka sorkar MDA, wei ini man ko kamwa chah kheiñ beiñ wei yooh beiñ ya i hok longbru manbru ki paidbah neibhah lyngba ka Internet chiboon bah ki kaam wa ye u pyndep nadooh ka puræ puthi, ka khayi pateiñ, i thooh kaam thooh jam wa kiwi kiwi kiwa ym ye de wow khoh pyrtuid, tangwa lyngba ini i leh ka sorkar, daki phaw klur tyngka da pynsepai yaka poisa wa su neibynta ki Data Pack yong ki paidbah neiwa pyndooh yaka Internet.
Hajrong ini, i kylli toh wa kiyi wow kitkhlieh ya i dooh yaka poisa Data Pack yong ki paidbah wa da pynsepai daka sorkar jylla?
Hei yong sakhiat hawa em kiwon kiwon ki kulmar hapoh ka jylla, ka sorkar ym toh u pyndooh ko yaka Internet, toh u thooh laad deiwa pynboon da ki pulit ha ki thaw wa em i kulmar, neibhah du da iwa pyndooh yaka Internet da kammon kammon leh, ka sorkar ym ye ko wow wanrah yei suk i saiñ haka jylla lada ym thooh da kiwi ki laad ki luti. Hajrong kani ka yurim, katkam ka riti shynchaar paidbah, ka sorkar toh u kitkhlieh ko wow pynuiñ biang ya katu ka Data Pack cha waroh ki paidbah kiwa da dooh yaka poisa wa da pynlut ki.
Discussion about this post