Jowai: Ka Seiñ Khynroo Khyllood Seiñraij Bataw hajrong ka thong wa ka yurim wow pynneh pynsah yei man kyrpang ka jaitbru wei ngait niam katkam wa pynjooh wa sikai na warim, ha kani ka Mulong 8 tarik u Wisu 2020 ha Madan Umkoi da pteiñ biang ko wow pynman ya ka Dorbar Niamtre wa le, kyrpang neibynta ki khon ka Raij Bataw wa kiwi ki chnong ki raij wa em hajan.
Ya ki bynta ka Dorbar Niamtre ha kani ka sngi da pynlai da u Jenefi Ram Rupsi heiwa ya ki kyntien pdiang burom da yoh na u Tony Byrloi, Secretary Seinraij Bataw pynbood i ngoohblai ngoohsyiem na u Sunia Tariang, ya ka lama ka Seiñ da pynhær da u Dawe Pohlong kam uwi na ki waheh wasian ka Raij katwa ya ki kyntien sñiawngooh ha ka bynta wa kut da e da u Bhalang Suchiang, Waheh Chnong ka Bataw.
U Chalanbha Dkhar ha kani ka Dorbar Niamtre dawan embynta u kam u kongsan wei da e u leh ki kyntien e mynsien ya ki khon ka Niamtre wa wan ha kani ka Dorbar katwa kiwi kiwa da e i klam i kape kyrpang hajrong ki phang wa yatoh wa kani ka Dorbar Niamtre toh u Kamnipaia Challam, uwa da klam hajrong ka phang wa ong “Ka lyngkor ki khynroo-khyllood ha ka niam ka rukom”, u Doloi Elaka Jowai u Puramon Kynjin da klam u hajrong ka phang “Ka niam ka rukom, ka riti-dustur, u Trekirot ha i da pynkhamkti, u kune chithyndai pyrthai,” ka Waisa Sumer kam ka manbei da klam ko ha ka phang wa ong “Ka kynthai kam ka Kchu ka Siang ha ka niam-rukom” katwa u Moonlight Ktung won da klam e mynsien u ya ki khon ka niamtre ha ka phang wa ong “Yei stat u thooh-nongrim u pynskem,” kiwi won ki waheh kiwa da e kyntien sneiñ kyntien kroo ha kani ka Dorbar Niamtre toh u Noren Palong yong ka Seinraij Bataw wa u Leki Sayoo, President Le Raij, Byndihati, Dienchynrum, Khliehriat.
Chooh chooh da pynchoh pynwyrngia ya kani ka Dorbar Niamtre da ki chaad, ki rwai sur tre kiwa da yachimbynta da ki khon khynroo khyllood wei khaddooh won kam ka dak i pynkut ya kani ka Dorbar Niamtre u Dren Biam kam uwi na ki waheh wasian ka Raij Bataw da pynhiar u yaka lam ka Seinraij Bataw.
Discussion about this post