Uwi u khynroo na East Jaiñtia Hills uwa man leh u muktiar uwa kreh neibynta i bha i miat ka ri-loom Jaiñtia, u Kynjaimon Amse, ynne da thoh u cha u Chief Secretary ka jylla, hajrong i duna ki sahep wa pait wa yoo ya ka District.
Ha ka dorkhat da pyntip u katni hapoh ka District em du uwi u Extra Assistant Commissioner (EAC)/ Magistrate First Class wei ini da neh i kattu la kamwa chi snem.
Da ong u leh wa u EAC kreh u leh kam u Block Development Officer ka C&RD Saipung Block wa ka C&RD Khliehriat Block wei u jooh da kreh u leh kam u Magistrate First Class ha yung kasari ka Khliehriat.
Chooh chooh da ong u wa uni u sahep da haap chimkti u ya kiwa boon ki kaam kiwa phær neiwi cheiwi wei ini i haap beh kreh u nawi chawi da ktah bha ko ya ki paidbah khamtam wa yatoh wa ki kaam pynroi khamtam ha ki thaw palatsor.
“Nga ym sñiawthooh O neiyi i daw wa ka sorkar ym pynbait ko yeini i eh wei neiyi i daw wa phah (Depute) ya ki EAC wow man kam ki BDO ha ka District,” da ong u Kynjaimon ha ka dorkhat.
Da ong u leh wa nachwa em le ngut ki EAC ha ka District, tangwa nei chah kyrriah kreh wa i ku kyrdan kini ki sahep hadooh katni ka District da kreh ko du lyngba uwi donhi u EAC.
Heijooh i por da pynkynmoo u wa chwa u 2019, ka sorkar hadien wa phah ko ya ki EAC cha ka District tangwa hadooh ynne ka sngi ym em wa wan chimkti ya i kreh iwa pynyoo wa tlot wei khalær i rukom krehkaam ka sorkar.
Neiliang uni u khynroo da kyntu u ya ka sorkar wow pynbait noh yeini hapoh ka District neibynta i myntoi wa i suk ki paidbah deiwa phah sa ar ngut ki EAC ha yung krehkaam u Deputy Commissioner, EJH.
Discussion about this post