U Khñiang Coronavirus ya uwa da tip leh katni kam u COVID-19 da hiar bha i poor u kamjooh leh i chim u ya ki mynsien bru.
Du ha China kiwa da yap na uni u khñiang da em ki 3,162 ngut wei hawa wyrchaw ha ka 7 tarik kiwa yap da em ki 3,073 iwa mut wa ha kini ki 3-4 sngi da yap du hapoh 100 ngut donhi.
Heijooh i por kiwa da yoh ya uni u khñiang ha China hadooh ynne da em ki 80,955 ngut hawa wyrchaw na ki 80,813 ngut iwa pynyoo wa ha kini ki 3-4 sngi uni u khñiang da poor u du cha ki hapoh 150 ngut donhi.
Hawa wyrchaw yeini i hiar i chah ktah ha uni u khñiang ha China wa kiwi ki ri ka pyrthai (lait na ka China) da man i mar dei lyndet.
Katkam wa man ynne ka sngi ka ri Italy toh kawa chah ktah dooh deiwa da em hadooh ynnin wa da pyntikna wa em 631 ngut kiwa yap wei kiwa yoh ya uni u khñiang da em ki 10,149 ngut.
Ha Italy katkam wa man hi ya uni u khñiang da pynbna wa da yoh nyngkong ya oo toh dang ha ka 21 Thohlakhmi uni u snem wei ymye u pynsangeh yei poor uni u khñiang iwa da pynbor ya ka sorkar Italy wow khangkset pyn yaka daka hi (Quarantine) hadooh ka 3 Naitung (April).
Kawi won ka ri wa da chah ktah bha toh ka Iran heiwa da yap 354 ngut na ki 2,959 na kiwa yoh ya u COVID-19, ha America da yap 31 ngut na ki palat 1,000 ngut wa yoh ya oo.
Katkam wa man kattæ ha kylleiñ ka pyrthai (Lait na ka China) da palat 32,800 ngut wa yoh ya uni u khñiang katwa kiwa da yap da em ki palat 1,100 ngut.
Discussion about this post