Jowai: Ka Women’s Cell (RUSA) Committee waka Seminar Committee yong ka Kiang Nangbah Govt. College Jowai, ynne ka sngi da pynman ki ya ka Seminar yow pynsñiawthooh yaki khynroo khyllood puræ heiyatoh i ya ryngkat kyrdan næ Gender Equity waka Domestic Violence namo i chah ban beiñ ha yung, heiwa ya kani ka Seminar da kyrchaan poisa daka Rashtriya Uchchatar Shiksha Abhiyan (RUSA) kawa pynman ha Kiang Nangbah Govt. College Auditorium.
Ha kani ka Seminar da wan ya chimbynta da kiwa puræ ka Thomas Jones Synod College Jowai, Nongtalang College Nongtalang, Jaiñtia Eastern College Khliehriat waka St. Anthony College Extension Byndihati.
Ka Dr. E.M. Blah Principal Kiang Nangbah Govt. College hawa klam da ong ko wa emkaam i yaryngkat kyrdan hapyrdi kynthai wa chynrang, neibhah kamwa da yoo ki chynrang em ki i kyrdan rap hakhlieh bar yaki kynthai la haka imlang sahlang, ki thaw khih thaw kreh næ ha yung ha sem.
Chooh chooh ong ko wa i wym ya ryngkat kyrdan pynhiar dor ko yaka ri heiyatoh i yoh i lai, i roi i paar, wei ini yah ko chei chah thombor ki kynthai ha kiwa hayung hasem kiwa emyatoh watip kam ka Domestic Violence.
Ka Domestic Violence mut ko yei thombor wa ktah yei doh i pran, i thij i pyrkhat yong ki kynthai. Kamtæ khut ko i yakrehlang kynthai wa chynrang khnang yow yoh ya i ya ryngkat kyrdan.
Neiliang ka kongsan yong kani ka sngi ka C. Lyngdoh DSP Crime Branch hawa e yei klam ong ko, ka kynthai em ko yei kamram wa kongsan tam haka imlang sahlang, emkaam wow burom yaka, neibhah ka kynthai toh ka bei, ka diah ka payu, ka kurim, ka paralok waka khon.
Kamtæ i wym ya ryngkat kyrdan wanrah ko i chah thombor ki kynthai ha kiwa boon rukom, wei boon naki kynthai sarom ki u mih chakhmat u pynsñiaw yei chah thombor wa jia pyn haka jooh ka tnoom wa yachong yasah. Tangwa i sakhiat hi lada suki bait ki, i chah thombor daw pteiñ i.
Heiyatoh weini da kyntu ko yaki kynthai wow tip yei hok yong ki hi, wow pynkupbor yaki hi neibhah toh ka luti wow yarap yaki hi, wei kamjooh leh kyntu ko wow Phone ha u number 181 khnang yow yoh yarap lada maad yei eh næ chah lehbeiñ ha yung, cha lait næ heiwon heiwon i thaw.
Neitæ won wow pynemkaam leh yaki yutip wa jan tam wa em ha kti kam ka Mobile Phone dei wow pynmyllien u puræ yaki laad ki luti wa ye u yarap yei im.
Haka yalang wa pynlai daka P. Mukhim Associate Professor Physics Dept., da yoh leh i klam naka A. Mawa Associate Professor ka Botany Dept. waka Dr. R.W. Thangkhiew Assistant Professor ka English Dept.
Discussion about this post