Kat dang mih ki sngi i poor u khñiang Novel Coronavirus namo u COVID-19 dang joor i ha kylleiñ ka pyrthai heiwa wot ka World Health Organisation kamjooh leh ka Ministry of Health & Family Welfare ka sorkar pyrdi leh da booh ki ya ki kyndon wow bood khnang wow lait uni u khñiang u poor.
Katkam wa man hi, uni u khñiang joor i poor u ha ka tayaw wa le wa kawa soo nadooh wa sdang chem ya oo ha ki ri iwa pynman ya kini ki tayaw wa katni wa emkaam bha ya ki bru hapoh ka ri India wow chong ki hapoh yung yow lait uni u khñiang u poor.
Yow yada na uni u khñiang ye wow bood ya kini ki kyndon hawah:
Wow yaleh u man kiwa lehkhooid wei wow sait-kti dei langær da i sabon namo deiwa ñiaam da i dawai em kiad (Alcohol-Based hand rub) hanlada yoo wa khooid ki kti.
Wow tymmoh yei khmut wei ktien da i tana namo kot tissue hawa synrieh næ kyoh wei wow noh ya ki kot tissue mar dep pynemkaam ha ki tin noh-jhep wa em yutymmoh.
Wow jngai hawa yaklam wa ki bru khamtam kiwa em ki dak synrum, wei wow dam u kyoh ha kti.
Wow thaw yei chit i doh i pran dei langær wei wow tip lada thut hei bor riñ mynsien kamjooh leh wow lai cha ki doctor lada sñiaw chitom (chit, chitom u riñ mynsien wei hawa em kyoh) wei heipor wa yachem doctor wow kah yei khmut i ktien da ki mask næ da i that.
Da kyntu leh wa katwa ye toh u neh hapoh yung khlem mih cha lait lada ym emkaam.
Ya ki yutip wa bniah ye u phone ha u Helpline Number 011-23978046 namo ha ki helpline Number wa da booh da ka sorkar kam u 108.
Da kyntu leh wow kiar u ksoh-kti / khublei-kti; wow jngai na kiwa em kyoh wa i iñ-doh (fever).
Da kyntu leh wow kiar u tba ya ki khmat, i khmut wa i ktien da ki kti; ymhoi u kyoh næ synrieh ha ki kti khlem pynemkaam tana næ tissue.
Da kyntu wow dam u mynthu khiar ha ki thawpaidbah, wow laike cha ki thaw kiwa da chah ktah.
Da kyntu leh wow kiar na ki yalang paidbah, næ ki thaw paidbah wot hadooh wow chonglang boon ngut ha ki dukan.
Da kyntu ya ki khynnah wa hapoh 10 snem wow chong bait ha yung wei wow dam u lai chaki Park wa kiwi ki thaw kyndehke.
Emkaam wow pynkhooid ya ki soodong sookun ka yung ka sem.
Da kyntu ya kiwa palat 65 snem i rta wow chong ki ha yung wei wow jngai na ki thaw paidbah.
Da kyntu leh wow dam u lai cha ki Gym, Club wa kiwi ki thaw paidbah kamjooh leh da kyntu wow dam u pynpoor ya ki khubor hamsaya kiwa ye u wanrah yei syir mynsien.
Discussion about this post