Shillong: Ki paidbah ka jylla kam chibynta wow lait wei wow yada na i poor u khñiang COVID-19 (Coronavirus), da e ki yei ya krehlang waka sorkar jylla ynne ka sngi ha kiwa boon hi ki chnong, ha ki jar jair ki yung ki sem kawa da pynman yaki luti ki syngkieñ wow man ki kiwa lyngam kiaw kiaw kaw kaw, laitnoh ki kattu katni ngut kiwa mih kiwa ym hoi de u dam.
Ka sorkar lyngba ki yung krehkaam ki Deputy Commissioner da pynkrehkaam ki yaka Section 144 CrPC wa 24 kynta nadooh i por chiteiñ synyaw dei wym chah wow yalang bru deiwa khang leh yaki kari kamai wei kamjooh wow khang lut ya ki yaw khatam ha ki thaw sor. Wei neiliang u Montri Rangbah ka jylla, u Conrad K Sangma da pynbna u ya kani ka sngi kam ka Coronavirus Awareness Day ha ka jylla waroh kawi wa ki bru u man ki kiwa syndong wei wow pynkut noh ya u kynjri wa poor yong i kjut COVID-19.
Ini i phah yong ka sorkar wow khang ya ki yaw toh leh wow elaad yow siat dawai ha waroh ki thaw paidbah khamtam ha sor Shillong, heiwa ynne ka sngi da sakhi leh ya ki wakreh ka Shillong Municipality Board (SMB) wa da pynman ki yei siat dawai ha kylleiñ ki thaw wa yalang bha ki paidbah man ka sngi.
Ya ini i siat dawai pynyap ya ki khñiang kjut wa boon rukom, da pynman leh ha waroh ki yaw wa em ha ka nongbah wei kamjooh ha ki chong ki thaw, kam chibynta wow tem wei khanglaad ya i yoh wow poor u khñiang COVID-19 uwa da poor ha kylleiñ soodong yong ka pyrthai wei da chim leh ya ki hajar ngut ki mynsien bru.
Da sakhi ynne ka sngi yei ya ksohkti lang ki dorbar chnong wa ka sorkar wow khanglaad ya ini i khlaam, heiwa ki dorbar chnong lyngba ki kor pynbna paidbah da chim ki ya i bynta wow yalap wei wow khana lok yaki yaki kyrwoh sorkar wow batai bniah ya ki paidbah wow man kiwa syndong wow chim ya ki laad yarap wow yada pyn daki yaki hi.
Hawa yaklam wa u CEO ka SMB, u B.S. Sohliya, da ong u wa ini i pynkhooid ya ka sor deiwa siat dawai Hypochloride toh wow yada na u COVID-19, wei ini i siat da sdang nadooh i por step, deiwa phiah ha ki kynhun wakhian wakhian wow lai soodong ka sor Shillong wow siat dawai ha waroh ki thaw paidbah.
U Sohliya da ong u leh wa ini toh i pyrchang wa nyngkong wei daw pteiñ ya ini i siat dawai ha ki sngi ki tayaw ki wow wan, da kyntu u leh ya ki paidbah wow man ki kiwa syndong nadooh na yung, deiwa pynkhooid ya ki gate, ki dwar wa kiwon kiwon ki thaw wa ye u khñiang kjut wow chong da ki Dettol lane da ki dawai pynyap khñiang kjut.
Discussion about this post