Jowai: Ynne i janmiet da em kattu katni ki dukan dai mar baam ha Iawmusiang, Jowai kiwa da wai dukan hadooh 5:00 waje.
Hei yaklam wa kiwa pynlai chnong ka Dorbar Chnong Iawmusiang, Jowai da pyntip ki wa hadien wa yoh ya ka hukum na u DC ka District, ka chnong da chimkhia ko yeini wei da pynbna paidbah wow wai ki dukan le kynta nadooh 2:00 waje i sngi.
Ki dukan wa wai toh du kiwa dai mar baam donhi.
Heipor wa wai kini ki dukan kam ha Laad Kynroohsahlang wa ha Iawmusiang da yoh u sakhi ya ki bru wa yang ki ter-ter wow poi ka pali yong ki wow thied ya ki mar baam.
Kam chibynta wow lait na i yaknieh wa i awri awra, harood kini ki dukan da em ki bru ka aiñ kam ki pulit kamjooh leh ki dkhot ka Dorbar Chnong wow sonteri ya ki.
Hapyrdi wa dang sdang poor ka yutip wa wai ki dukan dai mar baam, ki bru leh da wan ki cha Iawmusiang wow thied yeiwa emkaam ki tangwa manda kynjoh ko 5:00 waje da phah khang noh ya kini ki dukan.
Kam wow pynkynmoo heini, ki dukan dai mar baam ha West Jaintia Hills daw man ki kiwa wai mynstep ka 28 tarik nadooh 9:00 i step hadooh 5:00 i janmiet.
Discussion about this post