Kiwa chong chnong ka Nongmulieh waka Mobakhon da pyntip ki wa haka 31-03-20 i saam ya u khoo rachon hapoh kini ki ar chnong da pynbaad ki wa leh chilliang u waheh chnong ka Mobakhon u Prose Dkhar uwa em ka thaw e khoo wei da jied u kat ya kiwa kwah u khlem pait yaka Ration Card wa ki bru.
Da pynbaad wa ya kani da leh u khlem da pynbna wyrta ha chnong chwa wow saam hadooh wa ki paaid chong chnong da neh ki hei doom hadooh wym tip de iyi mut uni u waheh chnong.
Chooh chooh uni u waheh chnong da kyrha u leh ya u waheh chnong ka Nongmulieh u Merry Rymbai neibhah wa uni u waheh chnong da pyrchang u wow e yumut yow leh haka rukom wa toh.
Kamtæ hawa kut yong kani ka sngi, u Merry O Rymbai u waheh chnong ka chnong Nongmulieh da lum u ya ki para dkhot chnong wow chong daka Committee yow pyrkhat ya i leh embor wei da rai leh wow pyntip cha ki bor ka aiñ.
Ha kani ka Committee ka Nongmulieh da rai leh wow lai yachem wa u Deputy Commissioner of Supply yow paan jar jiar i thaw saam rachon neibhah wym kwah de wow haap hapoh i leh embor uni u waheh chnong ka Mobakhon.
Discussion about this post