“Kyrpaad O ya ki bor District ka West Jaiñtia Hills wa ka sorkar jylla wow sñiawbha ki u pynbiang ya ki mar-baam hapoh ka chnong,” da ong u waheh chnong ka Shangpung Pohchnong, u Marki Rabon ynne ka sngi.
Da pyntip u wa katkam wa man kattæ ki mar-baam kam u khoo u dai ha ki dukan hapoh ka chnong (Retailer/Open market) da man ki kiwa duna bha wei ini da chem chitom bha ki paidbah.
I daw wa duna kini ki mar toh wym yoh laad ki tre dukan u lai thied mar wei manda yohlaad ki u lithooh mar na ki dukan dailang (Wholesale) ym yoh katkam wa emkaam.
Heijooh i por da pyntip u leh wa ki mar rachon (khoo) hapoh ka chnong da poi ki ynnin wei daw dai paidbah ya ki mynstep ka sngi.
Chooh chooh da pyntip u wa ki dukan dai dawai (Pharmacy) leh man ki kiwa da sdang u duna ya ki dawai dachin.
Kam wow pynkynmoo heini wa heipor ki montri wa ki MLA ka ri-loom Jaiñtia ha ka tayaw wa dadep da booddien ki yei pynkhreh ki ar district ka ri-loom Jaiñtia (East wa West Jaiñtia) wow yakhun ya u COVID-19 wei neiliang u Montri ka sorkar, u Lahkmen Rymbui da pyntip u wa ymtoh u em i duna ki mar baam ha ka District wei ki bor ka District u leh ki yeiwa emkaam hajrong ini, tangwa katkam wa man hi ki mar baam ha ki dukan dukdoh ki chnong man ki kiwa duna mar baam bha.
Discussion about this post