Hadien wa pynkrehkaam ya ka Lockdown ha waroh kawi ka ri kam chibynta wow yakhun prychah ya ka khlam u COVID-19, neiliang ka chnat ki kaam pohyung ka sorkar pyrdi namo ka Ministry of Home Affairs (MHA) da booh ko ya ki kyndon wow bood ki chnat ki sorkar pyrdi wa ki sorkar jylla heiyatoh wa kani u COVID-19 ha ka 24-03-2020 wa kamjooh leh ka 25-03-2020, 26-03-2020 wa 02-04-2020.
Ha madan da em boon i rukom sñiawthooh (Interpretations) heiyatoh wa kini ki kyndon iwa da wanrah yei thut ha i rukom pynlai ya ki mar wa emkaam namo ki Essential Items wei hajrong kini ki kyndon da yoh ka sorkar pyrdi leh boon ki buit ki budia na kiwa boon.
Neiliang u Union Home Secretary, u Ajay Kumar Bhalla da thoh u cha ki State Chief Secretary ki jylla wow pynche hajrong i chem chitom ki jylla wow pynpoi ya kini ki mar khamtam kam heini i por wa krehkaam ka Lockdown.
Da e nongmuna wa kam ki “Laboratories”, da pynlait ya ki na ka Lockdown wei kini kynthup ki ya ki Laboratory ki bru samen (Private) neibynta wow Test ya ki Sample COVID-19. Kini ki Sample ye u wanrah na kiwon kiwon ki thaw cha kini ki Laboratory wei i lai i wan ki wakreh namo ki Lab Technician wa i kit (Transportation) ya kini ki Sample na ki thaw pynlang cha ki Laboratory da pynlait ya ki na kani ka Lockdown.
Heiyatoh wa i emkaam wa man ka sngi da ong wa i dai (wa kynthup ya ka e-Commerce), i pynmih (production), ki kudam (warehousing) wa i kit (transport) ya kini ki Essential Goods kam ki mar baam, ki soh wa ki jhoor, i dud wa ki mar wa pymih na i dud, i doh wa dakha, ki baam mrad, symbe, sboh, ki dawai wa ki tiar rep, ki dawai, ki tiar sumaar, wa kiwi kiwi da pynche bha ha kini ki kyndon wa da booh.
Ha ka 29 Wisu (March) da pynmih ya ka hukum wow pynche wa i kyntien ‘Grocery’ u kynthup i leh ya ki tiar wow man kiwa lehkhooid (hygiene product) kam ki sabon sait-kti, dawai tynyap khñiang (disinfectant), ki body wash, ki shampoo, ki detergent, ki tissue paper, toothpaste/oral care, sanitary pads & diapers, charger wa kiwi kiwi.
Heiyatoh wa i lai bait wow pynpoi ya kini ki mar (essential goods) da pynche kamni hawah:-
Heiyatoh wa iyi wow kynthup ya ki mar baam wa grocery, da elaad ha ki sorkar jylla wow sñiawthooh (interpret) ki wa kini ki mar toh u kynthup ki ya kiwon kiwon kiwa pynemkaam da ki bru man ka sngi.
Heiyatoh wa i pynmih (Production), ki kudam wa i kit ya ki mar wa emkaam wei i chem chitom wow yoh ya ki Pass, neiliang ka sorkar jylla toh u ebor ko lyngba ka Authorization Letters cha ki companies/organization wa saam mar ha waroh ka ri wow chah ya ki u e ya ki Regional Pass ya ki wakreh khnang wow lai bait i kit ya kini ki mar wa emkaam wei da kyntu leh wow pynduna katwa ye heiyatoh wa kini i ebor (authorization).
Heiyatoh wa i krehkaam ki Railways, Airports wa Seaports neibynta wow kit mar kam (Relief) wei wow pynlait bru (Evacuation) da chem chitom heiyatoh wow yoh ya ki Pass na ki bor District. Kamtæ heiyatoh wa ini i khnang wow lait u thut kini ki kaam ha waroh kawi ka ri da chah ya ki bor ka Railways, Ports wa Airports wow e ya ki Pass du ya ki kattu katni ngut dnonhi neibynta ini i kaam.
Heiyatoh wa i kit mar hapyrdi ki jylla (Inter-state and Intra-state movement) khamtam ki truck wa ki kari kit mar, da chah ya uwi uwa yah (driver) wa uwi uwa yarap ya oo wei uwa yah leh toh u em u ya ka driver’s license. Lada ka truck/kari lai ko thylli, emkama wow rah ya ki Invoice, Way-bill wa kiwi kiwi neibynta wow lai kit mar. I lai i wan uwa yah wa uwa yarap ya oo cha ki thaw sah yong ki toh u yarap (facilitated) da ki bor sorkar.
Waroh i lai i wan ki bru wa em ya ki Pass toh u bood ki ya ki kyndon ka Social Distancing wei toh u man ki kiwa lehkhooid.
Ya kini ki hukum toh u pyntip cha ki bor District da ki sorkar jylla khnang wow lai bait ki kaam.
Discussion about this post