U MDC ka Tuber Constituency u Lasky Rymbai da e yarap u da u khoo kamwa 2.5 Ton cha kiwa chong chnong ka Tuber Shohshrieh. U MDC da saam khoo u cha waroh ki manyung kam wow kyrchaan yaki paidbah khamtam kam ha kini ki por wa chah ktah haka Lockdown ha waroh kawi ka ri.
Neiliang ka dorbar chnong wa kiwa chong chnong waroh dap ki da i sñiawngooh ya uwa mihkhmat uwa pait ya kiwa kup chilliang wei uwa yarap ya ki boon tylli ki emkaam yong ka chnong.
U Lasky Rymbai da e yarap u leh da u khoo 60 churia yaka chnong Mukhaialong yow rap chngaaiñ hei liang ka baam ha kam kini ki por wa khang chnong (Lockdown) na i daw wa poor u khñiang kjut COVID-19 hapoh ka ri kamjooh ki ri ka pyrthai.
Hajrong ini i leh sbun u MDC, neiliang ka chnong waroh kawi da pdiang sñiawbha ki dei mynsien wa sñiawkhia, wei heijooh i por ka Executive Body ka chnong da e khublei ko ya u Lasky hajrong ini i leh sbun yong oo.
Ya uni u khoo, ka chnong da dep pynbait leh ya ka rukom saam deiwa ekti bait ha kiwa pait yong ki jar jiar ki dong wow saam ya uni u khoo heiwa da em san tylli hapoh ka chnong.
Ka chnong hi waroh kawi da kitbok kitrwiang ko ya u MDC ka thaaiñ wow yoh u da i chait i khiah da i sumaar u Blai kynrad.
Discussion about this post