Jowai: Ka Hynniewtrep Youth Council-War Jaiñtia Circle hapoh i yahkhmat u President, u Yoodahunki Shylla, u Sport Secretary u Bonanza Shylla kamjooh kiwa kitkaam deilang waroh ki dkhot ka seiñ, da beiñ joor ki ya kiwa mihkhmat ka thaaiñ neidaw wa leh khlot ki halor wa sñiaw, wei leh thlah halor wa chynna, wot hadien waki paidbah wa dooh wa duk kiwa im dei khih mylla sngi da ood da pynsñiaw ki yei eh yong ki.
Da ong wa ha kini ki sngi daki hajar tylli ki manyung da maad ki yei jynjar neidaw wym yohlaad de u lai khih neibhah wa burom ki yaka Curfew ka sorkar bei waka sorkar jylla yow yada naka khlam kjut COVID-19.
“Neiliang ki bru wa chem jynjar haka thaaiñ da wan pynsñiaw ki yei eh yong ki cha ka seiñ hei yatoh i dooh baam neibhah wym em poisa de ki u thied khoo, wei ka seiñ dap ko dei sñiawkhia wa joor hajrong i kheiñ stiñ kiwa mihkhmat ka thaaiñ, kiwa heipor Election heh ki du i kular wow kit u bah yei eh i khoo ki kup chiliang sem chiliang tangwa katai ka kular yong ki man ko du kam i pynbiej paidbah donhi katwa ha kam kani ka por wa wan i jynjar wym em uwi wot leh uwa mihkhmat dap chynrang wow kyruiñ khmat chaki paidpah,” ong kiwa yahkhmat ka HYC.
Da pynbaad deiwa ong, kiwa mihkhmat ka thaaiñ tip ki du wow thok u chet kylla yaki paidbah heiwa mynlliñ lut ki yeiwa da dep kular nachwa, wei lymtoh kamtæ weileh cha kiwi won ki thaw ka jylla kiwa mihkhmat han lym em ki haka liang shynchaar leh ye ki wow yarap yaki paidbah yong ki katwa kiwa mihkhmat ka War Jaiñtia won wym ye ki?
Heijooh i por neiliang ka seiñ dap ko da i kthang mynsiem wow pait yaki paradoh para snam kiwa ood ha kam kini ki por, tangwa kam ka seiñ wym hun ko wow man nongpaitke donhi tangwa da yaleh chitom ko katwa ye i buit i bor u thooh ki laad ki luti khnang yow ye yarap yaki paidbah ha kam kani ka por wa wan i jynjar.
Kamtæ kyntu ko ya kitu kiwa mahajon wow sñiawbha ki u e yarap cha kitu wa maad yei chem pap ne i kyrdooh ha kam kini ki por.
Discussion about this post