Ka dorbar chnong Sohphoh wa haap hapoh ka West Jaiñtia Hills District, Meghalaya lyngba kani ka khubor na u General Secretary ka chnong Sohphoh u Mutshwa Thabah da maham joor ko ya waroh ki paidbah wa lai wa wan, ki tre chnong kamjooh leh ya ki palat chnong, wym hoi u kyndeh ke, wow pynjæd lane u pynsih ya ki tiar ki tar wa booh ka chnong ha ki sarok lane ki luti syngkieñ kam ki Signboard, ki Dustbin wa kiwi tawan ki tiar.
Kam wow pyntip, ha kini ki tayaw wa da dep, da em ki damok kiwa phut ya ka Signboard wa seh ka chnong ha Khloo Blai, i thaw wa em markhap waka chnong Larnai. Tangwa hadien kattu katni sngi kini ki damok wym ye u tipmit da wan booh biang ki ya ka Signboard hei thaw wa sai ki. Kamtæ, da kani ka khubor ka chnong da maham joor ko lada chem kam ya kini ki damok, kiwa myllien wow leh ya kam kini ki kaam wow pynjæd pynpra lane pynsih ya ki tiar ki tar. Ka chnong daw pynchitom ko da ki kyndon wa rap khor.
Ka chnong da kyrpaad ko leh ya ki walai wa wan lyngba ka chnong Sohphoh, wow man ki kiwa lehkhooid leh pliah, wym hoi u noh klumar ki ya ki jhep kat cha wa chem, khamtam ya ki plastic. Wow noh ha ki Dustbin wa da booh ha ki sarok wa ki luti syngkieñ, khnang wa ki wakreh, wa pynkhooid chnong u suk ki u pyllang na ki Dustbin.
Ka chnong Sohphoh ha kini ki snem wa da lai, da yaleh bha ko wow pynkhooid ya ka chnong ka thaw deiwa booh ya ki Dustbin ha ki luti ki syngkieñ ha ki dong ki chnat. Kamtæ da kyrpad ya waroh wow ya krehlang neibynta i miat i bha ka chnong ka thaw.
Discussion about this post