Ki arngut ki waheh chnong yong ki artylli ki chnong kitæ ka chnong Iooksi wa ka chnong Khonshnong da pynche paidbah ki hajrong i mih khubor kawa ong wa em i saam khoo ka seiñ West Jaiñtia National Council (WJNC) ha kitai ki ar tylli ki chnong.
Kitai ki arngut ki waheh chnong hadien wa yoo ki ya katai ka khubor da thooh yutip ki na kiwa chong chnong lada em sakhiat kiwa chong chnong kiwa yoh ya utæ u khoo kamwa da mih khubor, tangwa hawa thooh yutip da chem wa ym em uwi leh uwa chong chnong uwa yoh ya utai u khoo.
Katkam ka khubor wa da mih da ong wa katai ka seiñ WJNC hapoh i yahkhmat u Kitborlang Dkhar President ka WJNC (CEC ) da lai saam khoo ki cha kiwa dooh wa chitom mar 5 kilo cha kamwa 10 tylli ki manyung ha chnong Iooksi wa 13 tylli ki manyung ha chnong Khonshnong.
Kamtaæ kam kiwa yahkhmat chnong da kwah ki wow pynche paidbah khamtam cha ki para chong chnong wa ym em kam katai ka saam khoo da katai ka seiñ hapoh ka chnong wei ha i jooh i por da maham joor leh ya katai ka seiñ wa neini chakhmat ym toh de wow pynmih khubor kulmar ya i pyrtuid ka chnong khlem da em ki daw kiwa sakhiat wei sa iwi wa lada neini chakhmat lada mut ki wow leh ya kiwon kiwon ki kaam haka chnong toh u e yutip cha ki waheh chnong ka chnong leh.
“Ini i pynmih khubor yong katai ka seiñ wa saam khoo haki chnong yong i deiwa khlem em iyi iyi i saam khoo da pynman ko ya i kam kiwa yahkhmat chnong wow chah suba sih ha kiwa chong chnong, neibhah ym em uwi leh uwa chong chnong uwa yoh ya utæ u khoo,” da ong kitai ki waheh chnong.
Kani toh katkam ka kyrwoh wa da phah da u Sumarhok Passah, waheh chnong Khonshnong wa u C Tangliang, waheh chnong Iooksi.
Discussion about this post