Jowai: Ynne ka sngi kawa man ka sngi wa 18 yong ka Lockdown wow yakhun pyrchah ya ka khlam u COVID-19 wei da sakhi wa ki yaw ha kylleiñ ka Ri-loom Jaiñtia ki paidbah da sdang bood ki ya ki kyndon ka Social Distancing namo wow jngai iwi na iwi.
Tangwa ha Dawki da sakhi wa lang ki bru ya ki dukan dukdoh khlem kheiñ de ya ka Social Distancing.
Heiyatoh wa ini, hawa yaklam wa u waheh chnong ka Dawki, u Mankhraw Ryngksai da ong u wa da yaleh u pynsñiawthooh ya ki paidbah tangwa em ki bru kiwa na baar chnong leh kiwa wan thied mar napoh ka chnong.
Da pyntip u leh wa hapoh ka chnong dang duna bha ki bru wa krehkaam kam ki Volunteer wei ki bru ka VDP leh boonkaam ki wow yarap sonteri ya u pood wa ka ri Bangladesh.
Chooh chooh da kyntu u ya ki paidbah emkaam wow bood ki ya ki kyndon ka sorkar wei ka chnong leh daw yaleh ki u pynsñiawthooh ya ki hajrong i emkaam wow jngai iwi na iwi.
Heiyatoh wa ki mar baam da pyntip u wa ki mar baam ha ki dukan ha chnong man kiwa kiwa dang dap wei da ekhublei u leh ya ka Police Department Dawki, ka yung u Joy Kongwang, ka Dawki Amatuer Club wa khamta u MLA ka thaaiñ uwa man leh u montri ka sorkar jylla, u Lahkmen Rymbui kiwa da e yarap da u khoo, phñiang, jhoor wa kiwi kiwi ki mar wa emkaam ki paidbah ka chnong.
Discussion about this post