Shillong: U Lamphang ka Yung Dorbar Chna Aiñ ka jylla, u Metbah Lyngdoh ynne ka sngi da khut u ya ka yalang wa jhan hapyrdi kiwa yahkhmat ka Liang Synchaar wa ka Liang Pyrchah neibynta wow e i kyrchaan wa pura ya ka sorkar jylla.
Ha kani ka yalang na i liang synchaar da wan mihkhmat da u Symbood Montri Rangbah ka jylla, u Prestone Tynsong wa neiliang ka Liang Pyrchah, u Dr. Mukul Sangma.
Ha kani ka yalang da chim ya ka rai wow e sñiawbha mar 10% na ka tulop wa yoh ki cha ha ka Chief Minister Relief Fund kam chi bynta wow kreh lang wow yakhun pyrchah ya ka khlam u COVID-19.
U Metbah da ong u wa dap u dei sñiawkmen wa kini ki arngut da pynskem ki yei emkaam wei wow embynta lang waroh ki 60 ngut ki MLA wow e mar 10 % na ka tulop yong ki nadooh wa sdang ka 1 Naitung (Apr) uni u snem hadooh ka 1 Wisu (March) 2021.
“Kani man ko i e mon sñiawbha da waroh ki 60 ngut ki MLA cha ka Chief Minister Relief Fund,” da pynrap u Metbah.
Da ong u wa da pyntip u ya u Montri Rangbah ka jylla u Conrad Sangma wow emlang ha kani ka yalang tangwa neidaw wa em ka Video Conference wa u Montri Rangbahdooh ka ri, ymye de u wow wan.
Da e yaroh u leh ya ki paidbah khamtam kiwa synchaar chnong kiwa da e yarap kti timun tidiang ha kini ki ar tayaw wa dadep qwa ka jylla em ko ha i khang sbak.
Discussion about this post