Jowai: Ka Lockdown wa 21 sngi wow yakhun pyrchah ya ka khlam u COVID-19 da ktah ko ya kiwa boon khamtam kiwa khih mylla sngi ha kylleiñ ka ri khamtam kiwa imja na ki kreh wa yatoh wa ki kaam uiñke suwari.
Kawi na ki thaw uiñke suwari wa da chah ktah ha Ri-loom Jaiñtia toh ka Dawki kawa em harood ka Wah Mynngot heiwa da wan ki bru da ki spah ngut ha ka chi sngi tangwa nadooh wa krehkaam ka Lockdown kani ka thaw da man ko kawa thylli.
Hawa yaklam wa u President ka Dawki Tourism Development Society (DTDS), u Manlang Tynsong da pyntip u wa hapoh ka seiñ em kamwa 77 ngut ki dkhot kiwa imja kam ki maji wow kit ya ki bru ha ki lieñ ha ka Wah Mynngot.
Da ong u wa ha ka chi sngi uwi u dkhot kamai u kamwa T. 900 chi sngi wei katni waroh da dooh kreh ki.
Chooh chooh da pyntip u wa kini ki dkhot ka seiñ ymtoh du kiwa na Dawki tangwa em leh kiwa na Bakur, Darrang wa Shnongpdeng neibhah wa man ko ka thaw Elaka.
Da ong u wa khlieh u snem ha kini ki bnai boon bha kiwa wan uiñke cha kani ka thaw tangwa katni won da thylli lut waroh.
Da kyrmen u leh wa kani ka Lockdown u kut noh ko khnang wa ki leh u ye biang ki u sdang kreh kamwa jooh ha ki por wa dadep.
Discussion about this post