Ka chnong Mynso-B da em la ar tayaw da sdang ko u booh yaki thaw saitkti ha kattu katni ki dong kamjooh ki yung ki sem wow ya krehlang wa ki kyndon yong ka chnat i chiat i khiah khnang wow ye u yada ya ki paidbah hapoh ka chnong ka thaw nei maa.
Ka chnong Mynso-B hei yahkhmat u waheh chnong yong ka u RM Khlem da sdang ki u leh deiwa booh yaki thaw saitkti ha ki dong ha ki yung ki sem. I thmu wa kongsan neibynta iwa bha tam ya ki paidbah hawa wan hawa lai ki yoh ki wow pynemkaam deiwa sait ki kti yong ki. Kani leh toh ka nongmuna wa bha ya kiwi ki dong ki yung ki sem kamjooh ki chnong waphær waphær u booh ya ki thaw saitkti khnang wow yada nei maa u khñiang khlam COVID-19.
Da yaroh leh u Dr. Brightstar Langbang uwa man leh u BDO ka Laskein Block, West Jaintia Hills District ya i yahkhmat u waheh chnong ka Mynso-B neibynta wa emkaam bha u sñiawthooh ki paidbah u yada na uni u khñiang COVID-19 wym hoi u lehke wei emkaam u ya krehlang u chimkhia u booh kam kini ki thaw saitkti ha waroh ki chnong ki thaw kamjooh ki yung ki sem deiwa sait khooid ya ki kti.
Discussion about this post