U Lalrinzuala Thieite uwa man leh ka u General Secretary yong ka National Student’s Union of India (NSUI) wa pait ya waroh ka Jaiñtia Hills Unit da pynsñiaw u yei sñiawsih kthang hadien wa yoh u wow yaklam wa kiwa dai jhoor ha lawthymme, Jowai wa pynsñiaw ki yei dooh nong palat iwa kynjoh da ki phaw hajar lada nujor na i dor tre wa thied ki. Da pyntip ki wa katkam wa thied ki da poi ko cha T. 40, 000 lane T. 50,000 tangwa kat wow ye won ki u dai da ye ki du kamwa T. 10, 000 neidaw kani ka Lockdown kamjooh wa yoh ki u chong yaw leh du arsien chitayaw du kattu katni kynta kamjooh ym yoh ki wow dai khutia wei hap ki u dai yonglang dep te sei pyut bait ki jhoor iwa wanrah leh yei kyntait yei teiñ kiwa thied.
Nalor ini waroh, ha kini sngi da khang wow dai Wholesale yaki jhoor ha Iawthymme wei hap ki wow lidai chadooh cha Ialong, da ktah bha ko yei lai yei wan ka yong ki nalor wa dooh nong ki.
U Thiete da ong u wa kani ka Lockdown wa pynbna ka sorkar biang bha ko neidaw yow lait u poor u khñiang khlam COVID-19 kamjooh yow lait neiwon neiwon i jia wa sñiawsih tangwa nalor kini waroh, ka sorkar ym em pynkhreh kyrpang ko neibynta kiwa im sngi ha kaam dai kaam thied kiwa da chah ktah joor. Nalor ini, kiwa mihkhmat kam ki MDC/ MLA ym em bna ki neibynta i yap i im wei ym em hi wot tang uwi uwa lai kylli yei eh yong kini ki paidbah nalor wa kani ka Iawthymme haap ko heipait lyngba yong ka District Council.
Chooh chooh da ong u wa kamwa man katni da yoh 4 ngut ki montri napoh ri-loom Jaiñtia Hills tangwa ym em hiwot tang uwi uwa lai yarap ya kiwon kiwon wei ym toh du ka lawthymme hadooh waroh ki yaw wa em hapoh ri-loom Jaiñtia.
Ha iwi tawon i liang da ong u wa ka poisa wa da pynbna daka sorkar neibynta kitu ki wa khih mylla ki wym em hapoh kawon kawon ka seiñ ym pu em wa yoh yaka poisa.
Heiyatoh won wa i pynbna ha kini ki tayaw wa da dep da u MLA ka Jowai Constituency u Wailadmiki Shylla wa da pynlait ya u khoo katwa ye neibynta ka Jowai Constituency, tangwa boon hi kiwa yoh ya uni u khoo toh du ki bru kiwa kyrchaan ya oo, ym yoh ya kiwa toh u yoh. Kani da pynman ko kamwa leh Politics nalor wa da pynbna u wa ym toh u leh Politics ya kam kini ki por.
Kamtæ u Thiete da kyrpaad u ya ki MDC/ MLA wa ki montri napoh Jaiñtia Hills toh u thooh laad lane pyrkhat kammon u im ja ki paidbah wei toh u paitkhmat ki ya ka Jaintia Hills ym du ya kiwa dai wa thied tangwa kiwi tawon kiwa mylla wei wow pynim yaki kular yong ki heipor Election wow yarap wei wow emlang waki paidbah.
Discussion about this post