Ka Lockdown wa da pynkrehkaam ha waroh kawi ka ri wow yaleh pyrchah ya u khñiang COVID-19 da booh ko yei eh ya kiwa boon khamtam hei wow pyndap pynbiang ya ki marbaam mardih.
Nadooh wa sdang wow wai biang ki kattu katni ki dukan kamjooh i rukom pynbait yei pynman yaw wa da chna chipor, ki paidbah kiwa boon da ood ki wa da syad i dor ki mar khamtam u khoo deiwa pynbaad ya kiwa dai khutia kamjooh ya kiwa dai Wholesale wa dai syad, wei da mih leh i dawa naki paidbah kamjooh ki seiñbhalang wow pynbna ki bor District yaki dor ki mar.
Neiliang ki bor District naki por cha ki por da pynchlur ki yaki paidbah wow wan chakhmat yow ujor pyrchah ya kiwa dai wa chimkabu kiwa dai palat yei dor wa da booh.
Ha West Jaiñtia Hills District u DC leh da phah u ya kiwa dai wow booh yei dor marbaam mardih hakhmat dukan khamtam hadien wa da pynbna ya ki dor marbaam.
Ynnin ka 25 tarik kawa man leh ka sngi wa chah u wai dukan ha West Jaiñtia Hills, ha Jowai da man ko kawa duna bru hawa nujor wa kiwi ki sngi iwa ye u man naki daw wa boon, tangwa kat yei booh won yei dor ki marbaam mardih hakhmat dukan da chem wa duna bha kiwa leh.
Ki dukan won kiwa booh yei dor ki marbaam kiwa da yoh u yaklam toh kiwa da booh yei dor warim deiwa ong ki toh wa ym pu em yoh ki wow booh yei dor thymme.
Discussion about this post