Ka yung krehkaam yong ka Krishi Vigyan Kendra (KVK), Jaiñtia Hills kawa haap hapoh ka Directorate of Agriculture da pyrchang ki wow e yarap ya ki kattu katni ngut ki warep kiwa em hapoh ka Thadlaskein wa Laskein Block, West Jaiñtia Hills deiwa saam da ki Mask, i sboh (Organic), dawai siat khñiang (Bio-pesticide), ki symbe, ki dawai Vitamins wa Minerals.
Wot hapyrdi i khang chnong, ka KVK Jaintia Hills da yoh ko wow yachem ya ki warep wa kiwa ri mrad wa psan mrad hapyrdi ka 18 hadooh 24 tarik uni u bnai.
Kamwa da pyntip da ka Risa Lyngdoh, Subject Matter Specialist (Agronomy) wa kini ki warep toh ki kattu katni wa ka KVK da krehlang chwa ko wow e sikai yaki kamjooh wow pyrchang leh yaki rukom rep wa thymme (On Field Testing & Demonstration) ha ki thaw rep yong ki.
Na i daw wa chem chitom ki warep wow yoh symbe, ki dawai sboh, dawai khñiang wei kamjooh leh wa yatoh wa ki baam wa ki dawai ya ki mrad wa ri ki, da hap wow lai e ya kini kiwa emkaam, da pyntip chooh chooh da u Dr. Rimiki Suchiang, Subject Matter Specialist (Animal Husbandry and Veterinary).
I lai pait yong ki Subject Matter Specialist yong ka KVK, Jaintia Hills da man ko leh haki bynta ki kpær, ki lyngkha, ki thaw ri mrad yong ki warep wow ya phyllu yumut hajrong i eh wei kamjooh leh ki laad wow yada wei kammon wow yarap ya ki warep ha i liang yong ka rep ka riang wa i ri mrad.
Ka KVK Jaiñtia Hills u dang pyrchang ko wow e sikai wei yarap ha kini ki bynta katkam i emkaam ki warep.
Ki chnong wa yoh yarap toh ka Mulum, Niawkmai, Wahiajer, Sohphoh, Mukhnang, Mihmyntdu wa Tyrchang.
Discussion about this post