Jowai: Ka dorbar chnong Iawmusiang kawa man pyrdi yong ka chnong Jowai da kyntu ko yaki paidbah wa wan poi neibynta u chongdai næ wow thied u pet wow man kiwa bood ryntih yaki kyndon wada hukum ka sorkar wa kynthup nadooh i yajngai iwi na iwi hawa lai cheiwon cheiwon, u deiñ Mask chisien wada mih, u saitkti boonsien, u dam u mynthu kulmar khnang yow ye u yada na u khñiang COVID-19, heijooh i por wow dam leh u noh kulmar yei jhep.
U waheh chnong u E. Shylla khana u waka dorbar chnong daw pynkrehkam ko leh chiboon ki aiñ ki kyndon heiyatoh wa i khooid i suba ka chnong. Da ong haroh u kamwa da em chwa ki aiñ sorkar wa khang pyrchah wym hoi de u dih biri, sikret, ne mynthu kulmar haki thaw paidbah neiliang ka chnong leh booh ko yeini i kyndon maham, wei ini u krehkaam ko ym du ha kam kini ki por tangwa wot hadien wada kut ka Lockdown leh ka chnong u pteiñ ko wow pynkrehkam ya kani ka aiñ.
Heyatoh weini waroh da ong u wa nalor ki tre chnong, emkam leh i ya krehlang kiwa chong yaw kiwa wan thied wan pet, khnang yow ye u wanrah yei em akor em burom, i khooid i suba wa i chait i khiah.
“Kamwa da yoo ha kini ki sngi wot hadien waki Volunteer da kreh chitom ki wow pynlai bait yaka yaw ka haat leh, em won ki bru wa yaleh pyrchah khlem burom yaki aiñ sorkar, wei ini ktah ko yaki bor pynlai chnong,” ong u Shylla.
Kamtæ da kyntu u wa ha kini ki sngi wa daw pteiñ biang ka sorkar yaka Lockdown, kyrpaad u ya waroh ki chnong wa wan cha Iawmusiang u man kiwa kohngooh wei bood yaki kyndon aiñ.
Heijooh i por chim haroh u ka kabu wow e khublei ya waroh kiwa da ya krehlang neibynta u yakhun yow khñiang kjut COVID-19 ha kini ki sngi wada dep kynthup nadoh ki bor pynlai District, ki pulit, ki Doctor, ki Nurse, ki wakreh Municipal Board, ki Volunteer naki dorbar chnong waphær waphær wa kiwi won wada embynta neibhah wa lyngba yong ki kamjooh leh i bor pynyait wa stat u Blai da ye u yada hadooh ynne ka sngi ya kani ka kjut.
Discussion about this post