Da u khoo e yarap ka BDO Thadlaskein cha ki manyung wa chah ktah ha u phria ha Lapangap

Ka chnong Lapangap kawa haap hapoh ka West Jaiñtia Hills District kawa em markhap waka jylla Assam da yoh maad ko hadooh arsien ya i chah pynjæd ki yung ha u phria ha uni u snem 2020 katæ haka 21^st April 2020, kawa man ka sien kawa ar wa u phria uwa joor da pynsih u hadooh 157 tylli ki yung wei kiwa da chah kthah palat hadooh wa da sep lut ki marbaam mardih da em 118 yung.

Kamtæ hapyrdi ini i eh, ka Dorbar Chnong Lapangap dap ko da i sñiawchngaaiñ waka Block Development Officer Thadlaskein ka B. Blah da kdung maya ko yaka chnong deiwa e yarap da u khoo cha ki manyung hadooh 16 churia, wei ya uni u khoo da saam haka 27 tarik deiwa e mar 5kg.

Ka Dorbar Chnong da e khublei wei kitbok ko yaka BDO wa ki kaam wa bha yong ka daw lai ki chakhmat.

Ka kyrwoh na u waheh chnong ka Lapangap Pyllun u D. Lyngdoh.