Shillong: Ka sorkar jylla ynne ka sngi da pyntip ko wa ki 8 ngut kiwa da chah ktah ha u khñiang COVID-19 ha ka jylla da dep wow phah pait bniah lane wow Test biang ya ki wei ynne ka sngi da yoh yaka Result wa ym em de ki ya uni u khñiang COVID-19 tangwa daw hap ki wow Test biang hadien 24 kynta.
Hawa pyntip ya ini, u Prestone Tynsong da ong u wa ka jylla kattu da sdang chngaaiñ wow lait na uni u khñiang katkam ka Report wa da yoh ya kitai ki 8 ngut kiwa da chah ktah. Tangwa da ong u wa yow pyntikna wa da chait da khiah ki, hap wow bood ya ki kyndon wa da phah da ka World Health Organisation (WHO) wei kamjooh da ka Health Ministry yong ka sorkar India wow phah Test biang sa chisien ya kitu kiwa kjut hadien ka 24 kynta, chwa wow pynbna da chait wei da lait ki na ini i kjut.
Hawa kylli ya ki 3 ngut won kiwa em ya u COVID-19, u Prestone da pyntip u wa waroh 3 ngut man ki kiwa khlan wei ka 14 sngi yong kini leh daw kut ko myntu ka sngi wei daw phah Test biang ya kini ki 3 ngut yow chem yei long i man yong ki.
Hawa pyntip chooh chooh yei long i man ha ka jylla hawa yatoh wa uni u khñiang, u Prestone da pyntip u wa hadooh ynne i janmiet da phah 1397 tylli wow Test, ki wym em iyi iyi da em ki 1288 tylli, kiwa dang yang yaka Report toh 97 tylli katwa kiwa yoh ya uni u khñiang neh ki kamjooh 11 ngut.
Discussion about this post