Yoh yarap kiwa duna hei doh i pran ki ar chnong da u khoo na u Org. Secy. ka FKJGP

U Organising Secretary ka FKJGP, Jaiñtia Hills u D.S. War, ynnin ka sngi deilang wa emlang ki dkhot yong ka FKJGP-Thadlaskein Circle, da e sñiawbha ki da u khoo cha ki bru ki wa duna ha i doh i pran (People With Disabilities) haka chnong Umjalisiaw, Mukhnang kiwa haap hapoh ka Raij Namdong.

Heipor 10 waje i step da saam ya u khoo haka chnong Umjalisiaw hei emlang u waheh chnong, ki bei ki pa ki payu para yong kini ki bru wa em duna ha i doh i pran ki, ha chwa u saam ya u khoo da em ka yalang wa tbian, heiwa da yoh ya i klam na u waheh chnong u Knerlang Siangshai uwa da pynsñiaw ya i sñiawngooh wa i sñiawkmen kawa khroo ya u D.S. War wa em u ya kam ini i mynsien wyrai ya kini ki pli ki wym em u biang i doh i pran wa pura. Da yoh leh yei klam na kawi ka manbei kani ka chnong ka Aroma Pale kawa man ka Secretary VDP yong ka chnong.

Heipor 12 waje i sngi da lai saam won haka chnong Mukhnang (Namdong) ya kam ki jooh hi ki bru wa em i duna ha i doh i pran wei ha ini i por da emlang u waheh chnong, u Secretary yong kani ka chnong, ki rangbah waki manbei. Heini i chnong leh u waheh chnong da pynsñiaw u ya i jooh i sñiaw ya uni u khynroo uwa da e kyllooid mynsien cha kini ki bru kiwa em i duna ha i doh i pran wa ha i bor pyrkhat. Da ong u leh wa ha kam ini i por wa ki bei ki pa ki payu para yong ki kiwa pait wa sumaar yaki ym yoh de ki u lai khih lai kreh neibhah wa em kani ka Lockdown kamtæ man ko ka yarap kawa khroo yaki.

Ha i klam yong u D.S. War da pynsñiaw u ya i mynsien sñiaw-wyrai ya kini ki bru ki wym ye u khih u kreh wei wym em u yoh ki u man kam wa man ki bru waroh, wei da e mynsien u yaki leh wym hoi u dooh kyrmen ki deiwa kitbok kitrwiang yaki yow yoh ki ya i chait i nang wei wa u Blai Trekirot u kyrkhu kyrdoh u yaki.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong u leh wa ya uni u khoo ym toh wa yoh yarap neiwon neiwon wei uwa da thied hi na kata yong oo hi, hanla man ko i e wa kajiak leh wow chim pdiang yaka da i mynsien iwa khooid wei da kyntu u leh yaki paidbah kiwa em ka laad u sñiawbha ki u yarap yaki bru kiwa dooh wa duk kiwa chem jynjar khamtam ha kam ini i por wa em ka khang chnong hapoh ka ri ka yong i wei u bood ryntih leh ya iwa phah ka sorkar wei da kyntu leh yaka sorkar wow e yarap ko cha kam kini ki bru kiwa duna ha i doh i pran, pynkut ka kyrwoh na u Embhahlang Sariang, Education Secretary ka FKJGP Jaiñtia Hills.