Jowai: Ha kani ka 28 tarik i janmiet da chah ksoh ki 58 ngut ki baar jylla kiwa khih mylla ha Byrnihat, Ri-Bhoi heiwa manda kylli ya ki da kam ki wa da wan ki na Khliehriat, East Jaiñtia Hills. Kini ki bru toh kiwa wan na Byndihati wei waroh chi kattu chong wai ki.
Ynnin i synyaw ka 29 tarik heipor kamwa 12:00 waje won, ka Ummulong Beat House ka West Jaiñtia Hills won da yoh kem ya kawi ka truck kawa kit ya ki 68 ngut ki bru kiwa khih mylla ha EJH kiwa da yut tooh na kani ka District. Kini ki 68 toh kiwa na ka thaaiñ Khliehriat wa Dkhiah.
Hawa yaklam wa u DC ka EJH, u FM Dopth da ong u wa ya kini ki bru da pynbiang mar baam (rachon) ya ki chi tayaw chwa wei i daw wa yut ki ye i u man neidaw wa da pisa ki wei wa da jhan ki wow liwan chnong neibhah wa da sdang biang ki kaam rep.
Da pyntip u wa hadien wa chem ya ki na waroh kini ki ar thaw da wanrah biang ya ki cha East Jaiñtia Hills wei hadien wa dadep test ya ki da phah liwan ya ki cha ki thaw sah ki wa ki thaw wa booh kyrpang namo ki Quarantine Facility kam ha Khliehriat Higher Secondary School, Khliehriat.
Katkam ka yutip wa da yoh da ong wa kini ki bru da yut tooh ki deiwa pynemkaam ya ki truck wa thylli wow yut na kani ka District.
Hawa yaklam wa u SP ka District, u Vivekanand Singh Rathore da pyntip u wa ya iwa jia ha Byrnihat dang takit yeini, katwa yeiwa jia ha Ummulong ynnin i miet da kem ya ka truck wa pynemkaam ki kawa em u Number AS-01-FC-3389.
Ya uwa yah ya kani ka truck da kem ya oo wei da pynngat ya ki ha ki kyndon ka aiñ.
Neiliang u SP da pynksan u leh wa i daw hi wa yut ki na EJH toh wa jhan ki u liwan yung khnang wow yoh noh ki u rep wei da pynrap u leh wa ka sorkar pyrdi leh da chah ko wow sdang rep ki bru.
Hajrong kammon wa ye ki u lait na ki thaw sylli namo ki checkpoint, u Rathore da pyntip u wa ini ye u man toh wa ki truck wa chong ki toh kiwa da tymmoh terpal wei man i iwa eh bha wow sylli (yi em hapoh) yong kawi pa kawi ka truck wa lai lyngba ki sarok.
Discussion about this post