Jowai: Ynne ka sngi sa ka Seiñ Kynthai yong ka Dorbar Chnong Mynthong, Jowai da mih ko chakhmat wow e yarap yaki manyung wa dooh wa duk haka yalang wa tbian wada pynlai daka Stately Suting Chairperson ka Seiñ Kynthai ha Community Hall ka chnong.
I e yarap ka Seiñ Kynthai kynthup nadooh u khoo, u dai, i phniang, chana wa i blooh wei hadooh kamwa 81 tylli ki manyung wa yoh myntoi ha kani ka sngi.
Kam u pynkynmoo kani toh ka sieñ wa le waka chnong Mynthong da e yarap ko yaki paaid wa dooh wa duk kiwa da chah ktah na kani ka Lockdown yakhun pyrchah yow khñiang kjut COVID-19, heiwa nyngkong da e daka dorbar chnong iwa kynthup kam iwa e ynne hi ka sngi, wa ar ka seiñ khynroo da e ko daka poisa lyngba ka dorbar chnong iwa le won toh ynne ka sngi daka Seiñ Kynthai.
I rukom e won da jied wei pait bniah bha yaki manyung khnang yow lait u lai chiliang ne yoh ki jooh ki bru. Tangwa kattæ leh neiliang ka chnong ya kitu ki yung kiwa da kyrdooh ware ym banse hap hi ko wow e biang.
Ha kani ka sngi neiliang ki paidbah leh hadien wada e kti ya u khoo wa kiwi ki marbam haki da e khublei wei pynsñiaw ki i sñiawngooh ya ki dkhot pynlai chnong.
Da emlang ha kani ka sngi u waheh chong u L. Pohktai, u Adviser ka chnong u M. Lamare uwa jooh man leh u waheh chnong warim, u Secretary chnong u R.T. Khonglah, nalor ka Peggy Rose Thma, Secretary Seiñ Kynthai, ka Rest Shadap Executive Member wa kiwi kiwi.
Discussion about this post