Jowai: Hadien wa ki kattu katni ki seiñ da pynsñiaw ki yei pyrchah hajrong i thmu ka sorkar jylla Meghalaya wow wanrah mooyong na jylla Assam, ha kani ka kynti won ka Synjuk ki Waheh Chnong East Jaiñtia Hills leh da mih ko chakhmat wow pynsñaw yei pyrchah hei yatoh weini i thmu ka sorkar, deiwa ong wa booh sakhiat ko hei maa wa khroo yei chait i khiah ki paidbah ka East Jaiñtia Hills kamjooh ka jylla hi waroh kawi.
Da ong ko wa ya ki khynnah skur, ki wakreh wa dang em cha baar ka jylla ympu em e laad ya ki u liwan yung ki, katwa yow mooyong won da e laad u wanrah na baar jylla man i i wym sñaw yahap hiwot tang khajiak leh.
Sei wi leh ka Assam da tip wa man ko kam ka COVID-19 Hotspot hapoh ka thaaiñ mihsngi ka ri, kammon won u wanrah yow mooyong na katai ka jylla iwa booh hei maa ya ki bru ha kam kani ka por.
Kamtæ da kyrpaad ko ya ka sorkar wow pyndam chi syndon yeini i thmu, wei u lilam (Auction) noh ya u mooyong wa 32 lak ton wa dang em haka jylla bar wow wanrah da uwa na baar, neibhah ini toh i chait i khiah ki paidbah wei i khih i khan yong ki tre Jylla.
Neiliang ka seiñ da maham ko leh wa lada ka sorkar lai ko chaphrang weini, ka seiñ ym yohsa de ko u pynman yei yakhih hanla hapyrdi ka Lockdown leh.
Discussion about this post