Shillong: Ka sorkar jylla ynne ka sngi da rai ko wow pdiang noh leh ya ki tre jylla kiwa sahkut cha kiwi ki bynta ka ri India lait naka thaaiñ mihsngi.
Neiliang u Symbood Montri Rangbah ka Meghalaya, u Prestone Tynsong da ong u wa nadooh ka 11 tarik u sdang wow pdiang noh ya kiwi kiwa chong chnong kiwa neh cha kiwi ki jylla wa ki Union Territory ka ri, kiwa kwah wow liwan chnong deiwa pynbiang ya ka kari yong ki hi deiwa pyntip leh chwa cha ki Nodal Officer wow leh yeiwa emkaam.
Chooh choooh da pyntip u leh wa neibynta ki bru kiwa ymye u liwan dei bor yong ki hi, neiliang ka sorkar jylla da yaklam ko waka sorkar pyrdi wow pynkhreh yaki laad wa emkaam wow wanrah biang ya waroh cha ka jylla.
Da pyntip u leh wa kiwa kwah wow liwan hap pynlut ki dei bor yong ki hi lada kwah ki u wan biang cha Meghalaya.
Da kyrmen u leh wa ha kini ki ar sngi wow wan daw ye u pdiang lut ya waroh kiwa kwah wow liwan yung biang na ki jylla ka thaaiñ mihsngi kiwa da sdang wan biang nadooh ka 5 tarik uni u bnai.
Heijooh i por u Prestone da pyntip u leh wa hadooh ynne i janmiet da em palat 1680 ngut kiwa da wan uiñ cha yung na kylleiñ ki thaaiñ mihsngi ka ri na kiwa da pynpsiah pyrtuid chwa ha ka sorkar kiwa da em palat 3000 ngut.
Discussion about this post