Shillong: Ka Synjuk ki Nongsynshar Shnong ka Bri Hynniewtrep (SNSBH) da e yumut ko ya ka sorkar wa lada wanrah næ pdiang ko ya ki tre jylla kiwa da sahkut cha kiwi ki thaaiñ ka ri India toh wow wanrah ya ki ha kiwa boon bynta, wei ya kiwa wan na ki Red Zone næ ki thaw wa chah ktah bha ha u COVID-19 toh u pynsah ya ki ha ki Quarantine namo ki thaw wa da pynkhreh da ka sorkar.
Hawa yaklam wa u Secretary ka Synjuk, u RL Blah da ong u wa ka seiñ da yachem ko wa u montri rangbah ka jylla ynnin ka sngi heiwa ha ka bynta wa nyngkong toh wow elaad chwa ya ki tre jylla kiwa lai phah sumaar cha baar, wei hadien won wow wanrah ya kiwi kiwa wan na ki Green Zone næ ki bynta ki wym em chah ktah wei hadien won u wanrah ya kiwa em ha ki Red Zone wei ya kini toh u pynsah ha ki Quarantine Centre wa da pynkhreh da ka sorkar.
Da pyntip u leh wa ka seiñ daw yachem biang ko wa ka sorkar ha ka tayaw wow wan wow tip che yei em ki Quarantine Center, wei hadooh katwon ngut kiwa ye u booh ha kini ki thaw ya kiwa wan na ki thaw wa chah ktah.
Ha iwi i liang won da ong u wa neibynta kiwa wan na ki jylla ka thaaiñ mihsngi ym em ki hei maa neibhah boon hi ki jylla toh kiwa ym em ware u chah ktah ha u COVID-19 wei ye ki wow leh ya ki Quarantine ha yung yong ki hi kamwa da phah da ka sorkar ryngkat wow bood thij ya ki kyndon wa da booh tangwa lada em ki manyung hei wit ye wow phah sah ya ki cha kini ki thaw wa da booh ka sorkar.
U Blah da kyntu u leh ya kiwa wan uiñ biang cha jylla wa lada em i wit næ i sñiawphær hei doh i pran yong ki wow pyntip wut-wut cha ki bor sorkar wa cha ka chnat i chait i khiah næ cha ka seiñ khnang wow ye ko wow leh yeiwa emkaam.
Discussion about this post