Shillong: Uwa yahkhmat ka Congress ha Meghalaya, u Dr. Mukul Sangma da ong wa lada bood thlah bait ya ki kyndon næ i phah yong ka Indian Council of Medical Research (ICMR) hawa yatoh wa u COVID-19 daw wanrah ko yei maa wa i eh ya ka jylla hadien habood.
Hawa klam ynne ka sngi hadien ka yalang yong waroh ki MLA, uwa yahkhmat ka liang pyrchah da pyntip u hakhmat ka sorkar wa ym man u kohngooh thlah ya waroh ki kyndon wa da pynmih da ka ICMR, neibhah lada bood hi-eh ya itai wa phah ye ko wow wanrah yei maa næ ktah ya ka jylla kamwa man ha Delhi, Maharashtra wa kiwi ki jylla kiwa chah ktah bha ha u COVID-19.
Da ong u wa katkam i phah ka ICMR, toh u leh yaka Quarantine ha yung hadooh 14 sngi yow pyntikna wa ym em chah ktah ha u COVID-19, tangwa kamwa da yoo wa em 50-70% kiwa yoh ya u khñiang COVID- 19 toh ki wym em pynyoo ki dak ki chin wa chah ktah ki ha utai u khñiang, wei da pynrap u wa wot ki bru kiwa khlan kiwa em hapyrdi ki paidbah ye ki wow man kiwa rah ya uni u khñiang kjut.
Hawa yatoh wa i phah ka sorkar ya kitu kiwa liwan na baar jylla wow leh ya ki Quarantine ha yung, u Dr. Mukul da ong u wa hap wow bichaar bniah leh yei long i man yong i yung, boi khynnia næ em kiwa da tymmen neibhah ym ye wow booh hei maa ya kiwa ha yung næ ki marjan.
Da ong u wa ym ye du wow rah kti bait chajrong wow ong wa ye phi u leh Quarantine bait ha ki yung wa ki bei ki pa wa da 70-80 snem næ wow ong wa biang bait lada leh katkam wa phah ka ICMR, tangwa toh u bichaar bniah ya kini ki kyndon lada ye ki wow yarap sakhiat.
Da ong chooh chooh wa em boon kiwa da pyndep ya ka Quarantine, tangwa manda Test biang hadien, da yoh ki ya u khñiang COVID-19 wei da man Positive ki.
Discussion about this post