Jowai: Ka chong Nangbah, West Jaiñtia Hills District, da pdiang sñiawbha ko yaki kattu katni ngut ki khon yong ka chnong kiwa da wan na baar jylla ha kani ka 13 tarik, wei kamjooh leh daw pdiang ya waroh kiwa daw wan. Neiliang ka chnong da pynkhreh ko leh ya ki soo tylli ki Community Quarantine Centre neibynta yong ki khon ka chnong kiwa wan na kiwi ki jylla yow yoh ki u sah ha kitai ki Centre.
U MDC ka Nangbah u Lakhon Biam, u waheh chnong u Tonroi Iongwai deilang wa kiwa yahkhmat ka chnong wa ka chnong hi waroh kawi da ong ki wa i pynkhreh yong ka chnong ya kitai kiwa wan na baar jylla wow sah næ chong ha ki Community Quarantine Center, man ko kam chibynta wow yada ya kiwa hayung ha sem yong ki hi wei leh wow pynsuk ya kiwa ha yung yong ki neibhah lada chong ki ha yung yong ki (Home Quarantine), waroh kiwa ha yung yong daw hap chong Quarantine lang ki, deiwa chong næ sah ha ki Community Quarantine Center wa da pynkhreh da ka chnong daw pynsuk ya kiwa ha yung ha sem yong ki, yow yohlaad wow lai rep lai riang næ wow lai cha kiwi de ki kaam.
Neiliang u MDC u Lakhon Biam da ong u wa i eh wow chong ha yung toh wa ha nongkyndong kiwa boon hi ki manyung chem ki yei eh, neibhah ym ye ki wow yait u lait nei yajan wa ki dkhot yong ka yung wa ki paramar jan marpa. Da ong leh wa ini i leh yong ka chnong toh wow pynsuk ya kiwa yahkhmat ka chnong, ki wakreh ha i chait i khiah wa kiwa ha yung yong ki wow pait bniah wei sumaar ya ki.
Da ong u wa nalor wa ka chnong da leh ko ya iwa emkaam neibynta kitai kiwa da wan na baar jylla, da kyrpaad leh ya ki bor District yong ka West Jaiñtia Hill wow yarap lang ya kitai ki bru, khnang wa u ye u pynbiang chooh chooh ya iwon iwon wa emkaam yong ki.
Neiliang u Tonroi Iongwai, waheh chnong waka chnong Nangbah hi waroh kawi da e khublei leh ya ki wakreh yong ka PHC Nangbah nadooh u Doctor, ki Nurse wa ki wakreh yong ka PHC kiwa da kitkhia ya kani ka kaam neibynta wow yada na i poor yong u khiang kjut COVID-19.
Discussion about this post