Shillong: U Symbood Montri Rangbah ka jylla, u Prestone Tynsong da pyntip u wa hadooh ynne ka sngi da em 4681 ngut kiwa chong chnong kiwa da liwan cha ka jylla, kini kynthup na ki jylla wa em ha thaaiñ mihsngi wei kamjooh na kiwi ki jylla yong ka ri India.
Da pyntip u leh wa ya kini kiwa liwan da phah noh cha ki chnong wa em ki, hadien wa da dep wow pait bniah ya ki. Da ong wa em na kini kiwa liwan kiwa leh ya ka Quarantine ha yung wei em leh kiwa em ha ki Quarantine Center wa da pynkhreh da ki dorbar chnong.
U Prestone da ong u wa neibynta kitu kiwa eh wow leh yaka Quarantine ha yung, kiwa boon hi da lai sah ki ha ki Quarantine Center wa da pynkhreh kyrpang da ka chnong, wei neiliang ka sorkar ka da pynbiang ko ya i baam neibynta kitu wa chong chnong kamwa da kular.
Ha iwi i liang, da pyntip u wa ka chnat i chait i khiah hadooh ynne da dep ko wow phah 2712 tylli ki nongmuna (Sample) wow leh yaka Test, napyrdi kini 2597 ngut toh kiwa ym em chah ktah wa 102 tylli ki Sample toh kiwa dang yang yaka Report.
Discussion about this post