Ka seiñ Southern Border Youth Welfare Association (SBYWA), East Jaiñtia Hills District da dawa ko ya ka Company Jio wow pynbiang Network ha thaaiñ khappood khamtam ya u Tower wa em ha chnong Lama neibhah katkam i ood i naam yong kitai kiwa chong chnong heiwa da thut bha ka rukom krehkaam yong katai ka Network khamtam ha kam kini ki por Lockdown hawa ki bru da pait ki ya ki khubor næ ki yutip wa emkam yong ka sorkar lyngba ka Internet wa kamjooh leh ki bru da pynemkaam ki wow leh Online Class lyngba ki Mobile Phone, da man ko kawa chitom bha hawa boon ki chnong da chaniah wei da pynemkam bait ki lyngba u Tower wa em ha chnong Lama.
Kamtae ka seiñ da ong ko kamwa 10 tylli ki chnong wa kynthup yaka Lama, Borkhat, Kwator, Natbor, Demlakang, Pdengwahkhyriam wa kiwi de ki chnong kiwa pynemkam ya ka Network Jio hapoh ka thaaiñ da sñiaw diaw ki hajrong i thut katai ka Network man ka por kawa booh hei eh i khoo ya ki paidbah.
Neitæ ka SBYWA da dawa ko ya ka Company Jio wow pynbiang Network deiwa pynkhlan chooh chooh ya utai u Tower wa em ha chnong Lama tae lada ym em leh ko yei emkaam, ka seiñ daw ujor ko cha ki bor wa hajrong lane u phah khang chisyndon.
Kani toh katkam ka kyrwoh wa da phah lyngba u President yong ka seiñ u Skhembor Shadap.
Discussion about this post