Ka khlam u COVID-19 da wanrah ko yei doohnong iwa khroo ya ki bru, ka jylla, ka ri waka pyrthai hi leh waroh kawi wei neiliang ka sorkar pyrdi waka sorkar jylla yaleh ki wow yakhun pyrchah ya kani ka khlam deiwa kreh khlem sangeh.
Hadien wa sdang kani khlam ka sorkar jylla da pynlait poisa ko hadooh T. 57.98 klur cha ka chnat i chait i khiah wei na kani, T. 45.85 klur toh na ka sorkar jylla katwa T, 12.13 klur won na ka sorkar pyrdi wei ini da yarap bha i ya ka chnat ha kani ka yakhun.
Nadooh wa sdang ka Lockdown da chah ktah bha i rukom im ki bru man ka sngi kamtæ ka sorkar da yaleh ko katwa ye wow pyndap wei wow yarap ya ki bru la kiwa em ha ka jylla namo cha baar leh kamjooh. Neiliang ka sorkar pyrdi da sdang ko wow e yarap da ka Pradhan Mantri Garib Kalyan Yojana.
Ka sorkar jylla da e ko T. 3,000 cha ki bank account ki 24,516 ngut ki Registered Building and Construction Workers, T. 2,100 cha ki 1,81,491 ngut hapoh ka Chief Minister’s Relief Against Wage Loss Scheme wei waroh ka sorkar daw pynlut ko T. 38.11 klur neibhah ini.
Wow yarap ya ki tre jylla wa em cha baar ka sorkar da e ko T. 3,000 cha ki 9,224 iwa kynjoh T 2.77 klur.
Chooh chooh wow pynbiang mar baam ar tayaw cha ki manyung wa hap chong kset (Quarantine) da e yarap cha ki 10,000 tylli ki manyung iwa kynjoh i lut hadooh kamwa T. 2 klur. Da e T. 26.38 klur cha ka chnat Food and Civil Supplies Department wow saam wei wow e 58,639 Quintal ki mar baam cha ki yaw. Wei ini waroh da kynjoh i T. 69.25 klur wa da pynlut na ka sorkar jylla heiyatoh wa u COVID-19.
Chirup wa ka T. 45.85 klur ha ka chnat i chait i khiah, waroh iwa da pynlut ka sorkar jylla da kynjoh i T. 115.10 Klur.
Ini man i katkam wa pyntip u montri rangbah ka jylla, u Conrad Sangma ha ka yung dorbar chna aiñ ka jylla ynne ka sngi.
Discussion about this post