U symbood montri rangbah ka jylla u Prestone Tynsong da pyntip u wa ka Special Train wa kit ya 231 ngut kiwa lai puræ wa kiwi kiwa na Meghalaya daw poi ki ha Guwahati Railway Station na Telangana myntu i miet.
U Prestone da pyntip u wa da em sa kawi ka Special Train na Haryana wa kit ya139 ngut kiwa naka jylla daw poi ko ha Guwahati Railway Station ha i janmiet ka sngi Bibar.
Da pyntip u leh wa sa kawi Special Train ka wow sdang na Delhi daw mih ko haka 27 tarik.
Ka sorkar da booh ko leh yaki Phone Number wa kyrpang neibynta kiwa em Delhi wa kwah u liwan yung. Kini ki Phone Numbers toh 011-23014341, 011-23014451 wa 9968262299.
Sa kawi ka rel na Jaipur daw mih ko haka 26 tarik.
“Ka sorkar jylla da yaleh ko katwa ye yow wanrah ya kitu kiwa sahkut ha Mumbai, Pune wa Goa da ki Special Trains,” da ong u Tynsong deiwa kyntu leh ya kitu kiwa sahkut wow man ki kiwa yaichah.
Ha iwi tawon i liang, u montri i chait i khiah u AL Hek da pyntip u wa yaki Samples wa da dep Test hadooh 2 waje i sngi ynne ka sngi da em ki 4538 tylli, heiwa na kini 4224 toh kiwa ym em chah ktah næ man Negative ki wei dang yang Result yaki 300 tylli.
Kam wow pynkynmoo wa hapoh ka jylla da em 14 ngut kiwa da chah ktah ha u COVID-19 heiwa da em uwi wa yap, 12 ngut kiwa da chait wa kawi kawa dang chah ktah (Active).
U Hek da pyntip u wa kitu kiwa sahkut kiwa da liwan na Bengaluru haka 21 tarik, 532 ngut na ki da dep leh Test wei ym em chah ktah ki ha u COVID-19 wei dang yang yaka Result i yong ki 671 ngut.
U Tynsong da pyntip u leh wa hadooh ynne, palat 9000 ngut kiwa na Meghalaya da liwan ki wei dang em sa 6500 ngut kiwa daw liwan.
Discussion about this post