Ka KSU Delhi Unit da pynsñiaw ko yei sñiawsih wei sñiawkhia ya i jia haka 23 tarik uni u bnai ha i por 4:30 i step heiyatoh wa i wan pynthut wei psiah yabor yong ki bru na Bihar haka Special Train kawa em 90 ngut tam ki nong Meghalaya kawa mih na Haryana.
Ka seiñ da ong ko wa i chah pyndik ki khynnah yong i da jia nadooh i por wa ki nong Meghalaya kiwa sahkut ha Gurgoan, Haryana kiwa da chah pyntip haka sorkar Haryana wa hap ki wow lai leh Screening cha Stadium, chi sngi chwa wo mih ka rel, ini da wanrah ko ya i klumar neibhah khlem em i pynbait chwa wow wan choo yaki na i thaw wa em ki. Wot hapyrdi ini i kynrum kynram iwa da pynkulmar ya ki bru, ka Nodal Officer ka IR Sangma ym em e batai che ko (Instructions) lane rap ko manda phone ki waroh.
Kani ka rel da mih ko na Haryana, ha ka 22 tarik uni u bnai, wei da em kamwa 90 ngut tam ki nong Meghalaya kiwa da liwan. Ha kani ka jooh ka sngi heipor 11:00 waje i miet da yoh yutip wa da em kawi ka khynnah kynthai kawa da khlaad noh hapoh kani ka rel kawa na jylla North-East wei ha kani ka jooh ka Compartment da chong le ngut kiwa toh ki nong Meghalaya. Mar ya yoh yutip chaphang ini, uwi na ki Volunteers uwa na Meghalaya da pyntip u wut wut cha ka Special Branch Meghalaya wei kamjooh leh cha ka COVID Police Control Room wow pyntip cha ki Railway Police Force. Hadien wa ka rel da sangeh ko ha Kanpur ha i step wa bood, ki pulit na kani ka thaw da pynbor ki ya kitu ki khynnah wa liwan wow sai ya i metyap cha lait. Tangwa ki khynnah Meghalaya da pyn-eh ki. Ki pulit hawa yoo ki ya ini, da pynlait noh ya ki. Hapyrdi ini i sangeh yong ka rel ha Railway Station, ki pulit ym em chah ki yaki khynnah wow lai thied yaka umdih leh.
Haka jooh hi ka sngi, da yoh yuitip lyngba u Vice President ka KSU Delhi Unit wa ki khynnah da yoh ki ya i baam wa da sih wei ha i step wa bood hawa ka rel sangeh ko ha Danapur Railway Station Bihar, da em i chah pynthut neiliang ki pulit ka Railway Station wa da em ki yei thmu wow pynpsiah yabor ya ki bru hapoh ka rel, wei ini i jia da pynsier ko yaki khynnah kynthai wa waroh ki nong Meghalaya kiwa em hapoh ka rel. Katkam i yoh yutip na u Vice President ka Delhi Unit da pyntip leh cha ki bor wa toh u pait, wot hadien ini leh ha i por 5:30 i janmiet da em i chah kawang moo yaka rel.
Neiliang ka Unit da kyrpaad ko ya ki bor wa toh u pait wa yaka sorkar wow pynpoi ya kani ka khubor cha ka Ministry of Railway wei wow booh ki bor wow yada ya kiwi won ki Special Train kiwa dang liwan kam na Rajasthan, Andhra Pradesh, Maharashtra, Kerala wa kiwi de.
Ka chnat kaam pohyung yong ka Sorkar India toh u tuklar ko hajrong ini khnang wa ym jia chooh kam ini i jia ya kiwa daw wan, pynkut ka kyrwoh naka Marbiang Khongwir, President wa na u Wallam K Nongseij, Vice President ka KSU, Delhi Unit.
Discussion about this post